Dunay gabii nga gibati ko ang tumang kalaay. Gitutokan ko ang bungbong sa lawak nga akong gihigdaan pamasin nga dunay magpakita. Apan bugtong kahilom lamang ang nipasulabi. Hilom ang palibot apan saba ang akong hunahuna.
Daghang mga butang ang nisulod sa akong panumdoman. Daghang mga butang ang nitumaw sa akong hunahuna alang sa umaabot. Tungod niini gidamgo na nuon ko. Sa maong damgo nakita ko ang akong kaugalingon sulod sa balay bungtod. Pag-abli nako sa ganghaan nakita ko ang laing porma sa panganod.
Uwan uwan kadto. Apan diha pa nako nasayran nga ang akong nakita dili gyud diay panganod hinunoa usa ka space ship kun mother ship. Nagtuyok tuyok kini duol ra gyud Kanako. Nahigmata ko sa maong damgo, kini tungod kay dunay nipaka, nidalgdog diay.
Ang kahilom mahimong sabton ingon nga:
1. Kahapsay diha sa atong hunahuna ug pagbati. Daghan nato ang dili buot nga mabilanggo sa mahilom nga dapit, kini tungod kay diha sa kahilom ato man gud makita ang tinuod nato nga mga kaugalingon. Usahay sakit ang kamatuoran mao nga daghan nato ang buot magpuyo sa bakak.
2. Dili kita buot makapasakit sa uban mao nga mas makaayo nga maghilom na lang.
3. Disiplina aron sa ingon mamahimo kitang ma pokus sa bisan unsa nga atong pagahimoon ug gitinguha.
Puno sa kagahob ang kalibutan karon ug daghang mga tawo ang walay pokus sa ilang kinabuhi. Unpredictable ang tanan.