Ang pagbuntog sa mga kabalaka

Matag usa kanato dunay kabalaka. Sa panahon nga kita mabalaka mahimong malibog kita sa mga desisyon ug mga lakang nga atong pagahimoon alang sa atong kinabuhi. Ngano Man?

Tungod kay sa matag higayon nga kita mabalaka, mawad-an kita og pagsalig sa atong kaugalingong katakus.

Ang kawalay pagsalig makapaluya kanato. Ang kawalay pagsalig makapadag-om sa atong palibot ug kalibutan.

Unsaon man pagbuntog sa kabalaka? Ania ang mga pipila ka mga mahinungdanong sugyot;

1.  Una, angkona nga duna kay suliran apan sa laing bahin angkona usab nga ang tanan lumalabay lamang lakip na ang imong mga suliran.

2.  Usahay naka punting kun naka focus lang kita sa suliran ug dili sa solusyon mao nga malisud alang kanato ang pagpakig-atubang sa reyalidad niini.

Mas hamtong ug haom nga solusyon ang pangitaon ug dili ang pagtugot sa atong kaugalingon nga sa suliran makalubong.

3.  Pag-ampo kay ang Ginoo mas dako ug mas lig-on pa kay sa atong suliran nga giatubang karon.

Ayaw kabalaka. Wala man gani mabalaka ang mga langgam nga mga langgam ra sila kita pa kaha nga mas labaw pa og bili sa mga langgam?