Panahon sa War on Drugs ni kanhi Presidente Rodrigo Roa Duterte (PRRD), usa si bigtime druglord Rolan Kerwin Espinosa sa mga nadakpan ug nabilanggo. Sa imbestigasiyon sa Senado, siya mismo miangkon nga druglord.
Gipasakaan si Kerwin og upat ka kaso: illegal drugs trading conspiracy sa Makati niadtong 2013 ug 2015 uban nila ni Marcelo Adorco, Ruel Malindangan ug Peter Go Lim ug paghupot og ilegal nga armas didto sa Leyte ug sa kaulohan.
Dihang mipayil si Kerwin ug Adorco, og demurrer to evidence sa korte, ang nag-unang duroha niya ka dagkong kaso sa illegal drugs naabsuwelto human makita sa huwes nga walay igong ebedensiya nga sarang momatuod sa maong mga pasangil batok sa mga giakusahan.
Sa miaging Hunyo 13, 2023, Martes, gitugotan sa lokal nga hukmanan sa Baybay, Leyte, ni Judge Carlos Arguelles, Regional Trial Court Branch 16, nga mahimo rang makapiyansa si Kerwin ug iyang mga kaubang akusado: Marcelo Adorco, Jose Antipuesto, Alfred Cres Batistis ug Brian Anthony Zaldivar sa kantidad nga P700,000 matag usa kanila. Makahasol baya kining hitaboa sa panghunahuna. Daghan ang nagtuo nga serado na kining mga kasoha. Sanglit, panahon pa ni PRRD kini nahukman. Pero, makapanglingolingo ka. Kay dihang hapit na mapupos ang termino ni PRRD gitayming ni Espinosa nga bag-ohon iyang orihinal nga testimoniya nga nagtumbok ni kanhi Senador Leila de Lima nga kakunsabo ra sa ilang illegal drugs business.
Giklaro ni Espinosa nga napugos lamang siya sa pagbuhat sa ingon tungod sa mga seryosong bahad gikan sa kapolisan bahin sa iyang kinabuhi ug sa kinabuhi sa iyang pamilya. Pero ang tinuod, pulos bakak ang maong mga pasangil nga iyang giyagyag sa Senate hearing batok ni Leila.
Gumikan niini, nakalingkawas si Leila sa duroha ka dagkong kaso sa illegal drugs. Ug usab si Kerwin. Mao nga makapangutana ka: “Weather-weather ba diay ang balaod sa Pilipinas?”
Sa administrasiyon man god ni PRRD, si Leila ug Kerwin gikasohan ug gipriso. Karon sa pagpamunoan ni Presidente Bongbong Marcos, diin daghang kapolisan ug opisyales sa PNP ang pro-drug syndicates, hinayhinay na silang gitangtangan sa ilang mga gapos ug hapit na mahimong gawasnon. Ingon niini na ba diay ka friendly atong balaod?