Engkuwentro sa Forest Hills

Hunyo 15, 2023. Alas 8:00 pasado sa buntag. Ang suki namong tinderog isda nga mag-multicab dili lamang pugapo, danggit ug pasayan ang gidala. Hasta iyang nasaksihan nga kagubot pag-agi-sulod niya sa eskina Forest Hills, M. Velez Street, Banawa, gipaambit sab niya ngari namong namalit sa iyang baligya.

Matud niya, naluoy siya sa bag-ong L300 nga gidrayban sa batan-ong lalaki nga gisumbag-lumping sa makadaghang higayon sa usa ka bagsikong maskulado, kinsa samtang may gipalit sa tindahang namaligyag karne daplin sa karsada, kalit lang naslayid sa gitungtongan niini (sanglit ulan-ulan man) ug didto mahipunta sa miaging L300 van. Pero wala kini maigo.

Naunsa ba, nga sa labihang kasuko, gipahunong kuno sa tawo ang van, gituktok ang bentana sa may driver’s seat ug dihang nangabli, gibinaboyg kasaba ang batan-ong tsuper, kinsa  naestatuwa dihang gidabodabohag suntok ang nagsinaw nga lawas sa van. Diin pagkahuman, isog mimandar: “Sige, larga na!”

“Maayo gani, Sir, kay nakatumong og mapailubong drayber ang maong bagsikong tawo ug wala mosukol.” Dugang asoy sa tinderog isda. Unya mipadayon: “Agianan man sa tawo kanang gitukoran sa tindahag karne, Sir. Mahimo nang matangtang kon dunay moreklamo. Misamot kahuot nang lugara, uy!”

May punto baya ang tindero’g isda. Tinuoray, kanang Forest Hills gamay ra ang dalan. Igo ra sa duroha ka magkasugat nga sakyanan. Unya gihimo pang terminal ang masig ka daplin sa mga namasaherog habalhabal. Ug pun-an pa, nga anaay mga namaligya daplin sa karsada, namora na hinuon kining lugara og taboan.

Wala mahiuyon kining situwasiyona sa ginadamgong Cebu City-Singapore like ni Cebu City Mayor Mike Rama. Nakadugang lamang sa dakong suliran diha sa iyang pagpahipos sa mga libod-suroy ug side walk vendors, diin miangkon mga barangay kapitan nga naglisod gayod sila sa pagpahawa. Unya, unsaon man nato pagkab-ot ang katumanan sa gitinguha tang Cebu City-like Singapore kon mao na lamang kini pirmeng ipangatarongan sa atong mga lder?

Mayor Mike, ang Forest Hills may gihambing suliran nga ang imong political will mao ray hingpit makasulbad. Nagakadako kini ug delikadong mapasagdan, hangtod makalipang pag-ayo ug dili na mapukan.

Ang kaugmaon sa atong siyudad anaa sa imong mga kamot, Mayor. Busa, kaanindot unta kon kini maaksiyonan dayon.