Isuwat ang reklamo

Nag-rally atubangan sa Cebu City Hall kaniadtong Miyerkules ang mga tindera sa Carbon Market kay gusto nila nga ibalik sila sa naandan nilang pwesto ug tugotan lang ang mga sakyanan nga makasu’d sa Carbon panahon sa night market.

Para nako, ang mga tindera makahimo sa pagpadayag sa ilang mga hangyo ngadto sa mga opisyal sa siyudad, apan dili maayo nga ipaagi nila kini sa paghimo’g rally.

Ang maayo nilang himoon mao ang paghimo’g suwat ug ipadala kini sa opisina nga nagdumala sa Carbon, ilabi na sa Market Authority aron mahisgotan ang ilang hangyo. Mahimo pa gani nga sila makatambong aron personal sila nga mosulti.

Law-ay man gud kaayo nga moderitso lang mo pagpahigayon og rally atubangan sa City Hall, unya magbitbit og mga plakards.

Sama gud sa gihimo sa mga operator ug mga driver sa PUJ nga kon may hangyo sila, isuwat nila ug ipadala sa Cebu City Transportation Office (CCTO), ug hisgotan dayon kini sa Traffic Management Board.

Pananglit dili mahatag ang inyong gipangayo, ayaw kasuko.

Natan-aw man gud nako nga duna gyuy mga tawo nga dili gusto nga moasenso ang Carbon Market mao nga sige sila’g alkontra.

* * *

Wa na ko matingala pa kon nganong pakyas ang mga opisyal sa kabarangayan sa pagtuman sa kamandoan ni Cebu City Mayor Michael Rama nga limpyohan sa mga basura ang ilang tagsatagsa ka dapit, apil na sa mga makililimos.

Kadaghanan sa mga opisyal sa barangay nangambisyon nga molansar gihapon sa nagsingabot nga barangay election, ug kon mag-estrikto sila, posible nga maibanan ang ilang mga botos.

Mao nga ang gihimo karon sa mga opisyal sa kabarangayan, nagpakabuta-bungol ra sila, ug dili sila makaisyu og Citation Ticket niadtong magpataka lang og labay og mga basura.

Nakahukom na lang tawon si Mayor Rama nga dili na lang hatagan og ultimatum ang mga opisyal sa barangay, kay bisan gani ang mga kawani sa City Hall nga gitugyanan sa pagbadlong sa mga makililimos wa man makatuman sa tahas kanila.

Bisan gani diha duol sa City Hall, anaa ang mga makililimos nga wa gyud mabadlong.

* * *

Wa motubag si Kamagayan Barangay Kapitan Raquel Avila dihang gipangutana sa mga reporters kon kinsa ang nagtugot nga himoong boarding house ang karaan nilang barangay hall.

Dili ko motuo nga wa masayod niini si Kapitan Avila. Tingali maikog lang siya kay basin iyang mga suod ang nalambigit niini. Pero kon gipaabangan ug nanawat sila’g boarders, asa man mopaingon ang bayad? Kon way resolusyon nga nagtugot nga himoong boarding house ang karaang barangay hall, aw ilegal gyud ni.

Huwaton nato ang gihimong imbestigasyon sa kapolisan.