EDITORYAL - K+10+2 mas maayo sa Kto12?

Walay maayong padulngan kining pagsige og usab-usab sa sistema sa edukasyon, dili kini makatabang sa mga kabataang tinun-an ug mao hinuoy makaingon nga daghan ang dili makatrabaho ug maapektohan ang ekonomiya sa nasud sa umaabot nga mga panahon. Duna karoy mga mga tinguha nga usbon ang kasamtangang Kto12 nga basic education, gusto ni kanhi presidente Gloria Macapagal Arroyo nga K+10+2 nga sistema.

Sa eksplinasyon sa iyang balaudnon, opsyonal nalang sa mga tinun-an ang pagkuha og senior high school, para lang kini sa gustong mopadayon sa kolehiyo. Kadtong dili, upat ka tuig nga high school paigo na para nila.

Dinhi sa Pilipinas, ang taas-taas nga maabot nga edukasyon gitinguha sa kadaghanan sa mga ginikanan para sa ilang mga anak.  Kun pananglitan buhaton kining K+10+2 ni Arroyo, duna gyuy mga tinun-an nga pilion ang upat ra ka tuig nga high school. Duna man gyuy uban nga tapolan moeskuyla ug duna say uban ang ila mismong ginikanan gustong dali rang “makahuman” aron ‘makatabang dayon’ kanila ilang mga anak.

Pila may edad sagad mahuman ang upat ka tuig nga high school, dili ba 16 anyos pa? Duna ba diay technical/vocational skills nga gitudlo sa upat ka tuig nga high school?

Sa kasamtangang Kto12, gustohon man o dili sa tinun-an o sa mga ginikanan ang sistema, wala silay mahimo.

Apan duna gyud silay makat-onan nga kamahoan nga magamit na nila dayon aron makatrabaho ini og kakompleto nila sa senior high school.

Tinuod dili tanang produkto sa Kto12 nakatrabaho gyud dayon karon, apan dunay daghan kanila ang nakatrabaho na karon sa mga Business Process Outsourcing ug uban pa, samtang nipadayon sa pagtungha sa kolehiyo.

Walay arang-arang og sweldo nga kompanyang modawat og upat ka tuig lang nga high school nga walay technological/vocational skills nga nakat-onan, samot na kun 16-anyos pa.

Dili perpekto ang Kto12 karon, apan dili lisod palambuon kay naa nay estraktura ug sistema apan kuwang pundo ug suporta. Apan unsa may garantiya nga kining K+10+2 ni Arroyo di masama sa Kto12?

Imbes magusik-usik sa panahon pagdebate anang K+10+2  ang mga magbabalaod, mas maayo pang ibubo nila ang panahon ug budget sa pagpalambo sa Kto12 aron mas daghan pa gyung kamahoan nga makat-onan ang mga tinun-an aron siguradong makatrabaho ug makatabang dili lang sa ilang pamilya kondili apil na sa ekonomiya sa nasud.