1. Dakong supak alang kanila nga ikaw maghunahuna (Opposing Critical Thinking)
Ang mga pangulo ning mga pundoka ang dili buot nga mapukaw ang imong hustong panghunahuna. Alang nila kinahanglang imong tunlon ang tanang pagtulon-an bisan pa man kun kini wala na magsukad sa rason. Sama pananglit sa usa ka tambalan nga nagsugo nga saworon gyud ang iyang singot kay lagi duna kini gahum sa pag-ayo sa bisan unsang sakit. O dili ba kaha kinahanglang makigdulog ka sa supreme leader isip sakop aron ka mapanalanginan.
2. Ang pag-isolate sa mga miyembro gikan sa katilingban ug ang pagsilot kanila nga buot Mopahawa.
Pinaati sa pagpangilad labina kun maghisgot ta og taliabot nga katalagman ang mga pangulo sa kulto mahimong mopasiatab sa bakak nga ang ilang pundok lamang ang maluwas ug nga ang ilang pundok lamang ang pinili sa Dios. Si bisan kinsa nga mogawas ang magabaan. (mahimong patyon) gani sa uban ang buot mopahawa labina kun kini sayud na sa daghang mga binuang sa ilang pundok. O ang bakak nga pasalig nga kun magpabilin sa pundok mamahimong madato o makadawat og mga yuta isip bahin sa katigayonan nga napanunod gikan sa mga katigulangan.
3. Pasiatab sa mga Linaing mga Doktrina nga Hawa sa Pagtulon-an sa Balaang Kasulatan
Kasagaran ning maong pagtulon-an gikan sa giisip nilang locutions ug apparitions. Ang locution mao kanang pamaagi diin ang lider kunohay nakadungog og mensahe gikan sa usa ka santos o sa Ginoo gyud mismo. Pun-an pa sa mga apparitions diin dunay panagtagbo nga nahitabo. Kining maong pagpangangkon maoy nakapahimo kanila nga lahi gikan sa kadaghanan. Sa ato pa, giisip nila ang ilang kaugalingon nga mga gifted o dili ba kaha mga appointed.
4. Gipaabot nila nga mamahimong magmatinud-anon ngadto kanila ang ilang mga sakop kun mga miyembro.
Ang mga lider sa kulto ang nagpaabot nga ang ilang mga tawo mamahimong magmatinud-anon kanila ug sa ilang mga pagtulon-an. Kining maong pagkamatinud-anon mamahimong ipasa hangtud na sa mga anak sa mga sakop nila. Kining maong pagkamtinud-anon ang kinahanglang pagasundon bisan pa man kun kini halayo na sa rason ug dili na gyud makatarunganon. —Sumpayan