Downward Mobility

Kini mao ang gitudlo ni Padre Henri Nouwen usa ka spiritual writer ning atong kapanahonan. Hinuon nitaliwan naman siya ngadto sa laing kalibotan. Ang maong matang sa mobility mao man ang mobility nga gitudlo kanato sa atong Ginoong Jesus.

Nianhi siya aron moalagad ug dili aron alagaran. Nahimo niyang suki sa mga kabus, mga biniyaan ug walay kapaingnan. Gani, kini man ang nahimong matang sa pagkinabuhi sa atong Ginoo. Matang sa kinabuhi nga buot niyang atong sundon. Kun buot natong mamahimong labaw sa tanan, kinahanglang magpaulipon kita sa tanan.

Apan lahi ang gitudlo sa kalibotan. Gitawag kini nila og Upward Mobility nga sa ato pa ang lihok kinahanglang paingon sa itaas. Kadato, kasikat, gahum. Kining mga butanga maoy gipangita sa kadaghanan nato karon.

Mao ni hinungdan kun nganong ang anaa sa gahum dili na buot monaog ug ang si bisan kinsa nga anaa sa gahum buot mopakita niini pinaagi sa pag-impose sa ilang presensiya bisan kun wala kinahanglana. Nahimong wala silay kaikog pagpangangkon sa ilang kaisog ug kahagip-ot aron pagtabon sa ilang katalawan ug kahaguka. Sama kaniadto sa karaang Roma aron dili masayran nga dunay suliran ang emperyo mao nga dunay festivals nga saulogon sa hataas nga panahon. Anaa na diay ang pagpaaron kaniadto pa.

Apan nindot gyud nga ang atong mga tiil nakatunob sa yuta. Kining maong pagtunob sa yuta nipahinumdom kanato sa atong kagikan nga mao ang yuta. Sayud kita nga moabot ang panahon nga kita mismo mobalik niini. Mao nga wala kitay angayan nga ikapanghambog ni ikapasigarbo.