Mokaon apan dili mabusog

Kini ang nadunggan nako nga wali ni Bishop Dennis kaniadto sa dihang gihimo ang Misa Requiem sa nitaliwang Ricardo Cardinal Vidal.

Kun atong sumadahon atong nakita dinhi nga dili maayong magpalabi bisan gani sa pagkaon. Kay walay kaayohan nga mahatag ang bisan unsang pagpalabi.

Sa akong nakita sa akong kaugalingon, akong angkonon nga daw nagkaluya na ang akong panglawas bisan pa man kon wala pa ako maabot og 50. Tungod ba kaha sa akong lifestyle. Daghang mga panahon nga ako nagpasulabi. Lakip na niini ang pagtrabaho. Mao nga hasta ang pag-ampo duna nay kalainan.

Kini tungod kay gikinahanglan nga akong pakalmahon ang akong lawas ug hunahuna aron mamahimong dispose ako sa pag-ampo.

Dili diay sa tanang panahon nga ang pag-ampo kinahanglang ipaagi sa paglitok og daghang mga pulong. Ang paghilom mismo usa naman ka matang sa pag-ampo.

Nagkahinay ang akong linaktan. Lahi na gyud kaayo kay kaniadto. Apan akong panghinaut nga ning maong kahinay lain ang mas molig-on ug molambo.

Kini mao ang pag-ampo ug mas mapalig-on pa unta ang akong relasyon sa Ginoo. Sa katapusan atong nakita nga wala na kitay lain pang pamatud-an.

Nahinumdom nuon ko sa pag-ampo ni Simeon nga nagkanayon: “Ginoo karon nga nakita ko na sa kaugalingong mga mata ang imong gisaad, itugot nga mohalin nga malinawon ang imong sulugoon.”

Hinuon kining maong paghalin dili pa hinuon sa laing kalibutan kondili sa kahimtang nga walay lain natong pangandoy ang makauban ang Dios. “Sulus Deus Sufficit!” God Alone will Suffice!