Mga baka sa sam-ang

Wala nako tuyoa nga bation og tumang kasuko sa dihang nakita ko ang lima ka mga baka gituyo pagtugway sulod sa sam-ang sa among parokya.

Ang rason mao kay daghang mga sagbot na ang nanubo mao nga gipatugwayan nila og tuyo.

Mao ni ang hinungdan tingali kun nganong daghang mga krus nga giugbok sa yuta ang nangabali. Makapungot hunahunaon.

Bisan pa man kun tinuod  nangamatay na ang tanan nga anaa diha, apan angayan untang hinumdoman nga sagrado ang minteryo.

Bisan gani ang pag-ihi duol sa mga nitsu o lubong ang dili gyud maayong himoon.

Tungod sa akong kapungot nakasulti hinuon ko og dili maayo hinuon akong gipaningkamotan nga dili ta makapasakit og pulong. Wala nalang ko mo-focus sa tawo kondili ni focus ko sa buhat.  Lisud na karong mga panahona.

Unta angayang mahinumdoman sa kadaghanan nga sama sa balay alampoanan ang sam-ang kun minteryo solemne man usab nga dapit.

Ug kay solemne man angayan lamang nga pasulabihon ang pagtahud ug dili ang paghimo niini ingon nga dapit sa pagpasipala ug pagbuhat og mga dapit nga dakong sukwahi sa pagtulon-an sa Simbahan.