Nagbilin og kasulatan ang amahan

Dear Atty. Divine,

Ang akong papa namatay na, but before siya namatay, naghimo siya og kasulatan atubangan sa barangay nga iyang gihatag ang among house and lot sa among kamanghuran nga igsuon nga lalaki. Iyang gibutang sa iyang kasulatan nga samtang buhi pa ang akong mama, dili pa sab mamahimo nga kuhaon sa akong igsuon ang maong house and lot. Lima mi ka magsuon so nahulog nga upat mi ka magsuon nga wa giapil sa bahin. Karon ang akong mama gusto nga ibaligya ang balay. Ang akong pangutana, valid ba to ang gipirmahan sa akong papa sa barangay nga naghatag sa house and lot sa akong usa ra ka igsuon? Unsa may husto gyud nga pagbahin sa kabilin basi sa balaod? Daghang salamat.  —  Lilia

Dear Lilia

Ang ginikanan samtang buhi pa, mamahimo nga mo-donate sa ilang property ngadto sa ilang mga anak. Kining property nga gi-donate makonsiderar nga advance share sa anak busa kun mamatay na ang ginikanan nga nag-donate, kwentahon to og apil ang property nga gi donate ug part na to sa share sa maong heirs nga gihatagan sa property. Kana kun naay laing property nga nahibilin ang mga ginikanan, apan kun wala, then kinahanglan gyud nga bahinon sa tanang heirs ang house and lot, so kamong mga igsuon mahulog nga co-owners niini, apan ang katunga sa share sa maong house and lot, iya sab sa surviving spouse nga mao ang imong mama. Dili to valid ang gipirmahan sa imong papa kun wa siyay laing property nga ikahatag sa uban niyang mga anak, kay basi sa balaod ang mga anak og surviving spouse, compulsory heirs kana og dili mamahimong hikawan sa ilang bahin sa kabilin. So, I think aron way samok, samtang buhi pa imong mama, kun magkasinabot mo nga ibaligya nalang ang house and lot then ang halin mao nalay bahinon ninyong tanan, katunga sa imong mama, then ang remaining half bahinon ninyong mga igsuon og hangyua nalang ang inyong mama nga dili na siya mangayo og usa ka share sa remaining half. Thank you and God bless.

Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.