Kamo akong mga higala kun….

Mayo 14, 2023: Ikaunom nga Domingo sa Pasko sa Pagkabanhaw

Mga Pagbasa: Buh. 8;5-8, 14-17/Sal. 66/1 Ped. 3;15-18/Jn. 14;15-21

Kini mao ang hagit dalang pasidaan ni Jesus ngadto sa iyang mga tinun-an.

Kun kamo akong mga higala tumanon Ninyo ang akong mga sugo.

Ang dakong sugo nga nagasukad sa Sugo sa paghigugma nga gipadayag nato diha sa paghigugma sa Dios labaw sa tanan ingon man ang paghigugma nato sa atong isigkaingon sama sa atong paghigugma sa atong kaugalingon.

Kining maong balaod kun mapuy-an lamang maoy mamahimong timailhan nga kita mga Kristiyanos kay matud pang Jesus:

“Pinaagi lamang niini ang mga tawo masayud nga kamo akong mga tinun-an!” Busa paghigugmaay kamo ingon nga ako nahigugma  kaninyo.

Pabilin kamo sa akong gugma ingon nga ang ako nagpabilin sa akong Amahan.

Sa laing bahin, nihatag og pasalig ang atong Ginoo diha sa iyang pag-ingon:

“Akong ipadala ang Manlalaban ang Espiritu sa Kamatuoran.!” Pasabot lamang kini nga bisan pa man kun dili na niya matumban ang kadalanan sa kalibutan apan padayon ang simbahan nga tinukod niya sa panaw niini padulong sa kahingpitan.

Ang maong Espiritu maghatag man kanato sa kadasig ug kainit diha sa pagpadayon sa atong pagtukod sa gingharian.

Ang Espiritu sa gugma ug kamatuoran nagdasig ug nagtabang kanato aron mamahimo kitang makatuman sa bisan unsa nga kanato gitahas.