Abril 30, 2023: Ikaupat nga Domingo sa Pasko sa Pagbanhaw Domingo sa Maayong Magbalantay
Mga Pagbasa: Buh. 2;14;36-41/Sal. 23/1 Ped. 2;20-25/Jn. 10;1-10
Kini ang matawag natong key word ning Domingoha karon, ang Domingo sa Maayong Magbalantay.
Karong dominggoha usab gisaulog sa tibuok simbahan ang Kalibotanong Adlaw sa Bokasyon diin atong giampo ang parianon ug relihiyosong bokasyon. Kining maong kasaulogan nagapahinumdom kanato sa atong dakong role isip mga magbalantay sa usag usa.
Katungdanan nato ang pag-amping sa usag usa maingon nga kita giampingan sa atong Magbalantay nga mao ang Ginoo.
Dasig sa atong kasamtangang papa nga kun mahimo manimahong sama sa mga karnero ang atong mga magbalantay sa kalag.
Ang tinud-anay nga pari dili lang magpuyo sa mabugnaw’ng lawak sa kumbento. Mogawas lang aron momisa ug mohimo sa mga naandang mga gimbuhaton kondili ang paghimo sa presensiya nga Sagrado nga masinati sa kadaghanan labina kanila nga anaa sa mga hilit nga dapit.
Sa atong pagsaulog ning World Day of Prayer for Vocations unta kita mamahimong balaan, abli ug tagana sa pagsubay sa dalan nga buot ipasubay sa Dios kanato. Ginoo magpadala ka unta og mga Balaang Apostoles sa Imong Simbahan!!
Nga sa atong pag-ila kang Kristo ang uban makaila kaniya pinaagi sa atong mga binuhatan.