Ang pagkagiw ngadto sa Ehipto

Ikalimang kasakit: Pamalandong

Dili lalim ang mokagiw aron molikay sa dakong kadaut. Sa akong pag-adto sa Holy Land kaniadto gikan sa Ehipto padulong sa Israel mga walo gyud ka oras ang panaw sakay sa bus. Samot na kaha kaniadto sa kapanahonan sa atong Ginoo diin kasagaran lakaw ra gyud ang  mahimo diha sa panaw.

Kasagaran pud kaniadto ang panaw mas safety kun ipaagi sa caravan. Kini ang nahiagoman sa Balaang Banay. Grabe ang discomfort nga nasinati nila, makalikay lang gikan kang Herodes nga buot mopatay sa bata gumikan sa insecurity niini. Nahimo siyang hulga alang sa iyang seguridad. Mao nga dili lalim ang nahiagoman nilang kahimtang.

Apan kining tanan nahitabo aron matuman ang panagna sa propeta: “Tawgon ko ang akong anak gikan sa Ehipto!” ang maong seklusyon usa lamang ka pagpangandam sa taliabot nga misyon. Mas dako nga misyon nga kinahanglanon.

Pangamuyo

O Mabinantayong Magbalantay sa Dios nga Nagpakatawo, O Mahimayaong Sano Jose dili dali ug malisud alang kanimo ang pagkagiw ngadto sa Ehipto kuyog sa balaang bata. Labaw na nga malisud alang kanimo nga sa maong halayong dapit ikaw magpaabot sa iyang paghamtong.

Apan sa laing bahin gibati mo ang tumang kalipay nga maduol ka sa kanunay diha sa Dios ug nga sa dihang nasud-ong mo nga nangapukan ang mga diosdios sa Ehipto ug nga ang mga Ehiptohanon nihapa aron pagdayeg kaniya.

Pinaagi ning maong kasakit ug kalipay, itugot alang kanamo ang grasya nga mamahimo kaming luwas gikan sa mapintason gikan sa impiyerno. Nga unta mamahimo kaming gawasnon gikan sa mga kakuyaw nga kahimtang.

Malangkat unta gikan kanamo ang mga diosdios nga among gisimba. Unta among simbahon ug alagaran si Jesus among Ginoo ug sangpiton sa kanunay ang Mahal nga Birhen Maria among inahan uban kanila lamang kami mabuhi ug mamatay nga malipayon.

Amahan Namo… Maghimaya ka Maria… Himaya sa Amahan