Kon si COMELEC Chairman George Erwin Garcia ang pabut-on, kadtong madeklarar nga mga nuisance candidates, ingon man ang ilang mga kasabwat, angayan bilanggoon ug pamultahon ug did-an usab paghupot og katungdanan sa kagamhanan tungod kay nagbugal-bugal lang sila sa proseso sa piniliay.
Maanindot unta ang maong sugyot apan kinahanglan usab nga paspas ang COMELEC moresolbar sa mga kaso kabahin sa nuisance candidates. Kay ginaingon man nga, “Ang sulti nga dili ubanan og buhat, usa lang ka pagsamok-samok ni’ng kalibutan”. Muleeeng!
Kabahin sa solusyon
Buot ni Cebu City Mayor Michael Rama nga sugod karong Hunyo 12, atol sa kasaulogan sa Independence, wala na’y makita mga basura lakip na ang mga street dwellers diha sa kadalanan sa dakbayan. Kabahin ang maong katuyoan sa halapad nga kampanya sa pagpanglimpyo aron makab-ot ang Singapore-like nga panglantaw alang sa dakbayan. Dili imposible kab-oton ang maong katuyoan labi na kon matag Sugboanon magtinabangay. Niinig awhag ni Mayor Rama, haum ang panahom nga, “Mahimo ka unta’ng kabahin sa solusyon, dili sa polusyon”. Mao man!
Kawaton ang tibuok riles
Gidasig ni Bise Presidente ug Education Secretary Sara Duterte ang mga estudyante nga anaa nahimutang sa mga gubot nga lugar sa Masbate nga mopadayon lang sa ilang pagtoon tungod kay mao kini ang yawe sa pag-undang sa siklo sa kakabus. Gasgas na ang maong mga pulong pagdasig nga giluwatan sa Bise Presidente kay kanunay na kini gigamit. Apan bisan pa, tinuod nga malisod alang sa tawo ang walay kabangkaagan. Kay matud pa bitaw, “Ang tawo nga walay edukasyon, mahimong mangawat lang gikan sa usa ka bagon sa train; apan kadtong naka-eskwela, mahimong kawaton niya ang tibuok riles”. Madahaan!
Res ipsa loquitor
Luyo sa pangulipas ni Gen. Rodolfo Azurin, Jr., sa giingon’g cover-up sa pagdakop ni Police M/Sgt. Rodolfo Mayo kabahin sa nasakmit nga 990 kilos nga shabu, namahayag si DILG Secretary Benhur Abalos nga angayan masayran sa publiko ang kamatuoran. Alang sa kalihim, ang nakita sa video atol sa pagkumpiska sa shabu, nagpadayag mismo sa tinuoray panghitabo ubos sa legal nga prinsipyo nga “res ipsa loquitor”. Madali tinuod ang pagpasangil apan molutaw ra ang kamatuoran sa kapulihay. Haum ni’ng pagpangulipas ni Gen. Azurin ang panultihon nga, “Walay makalabaw sa kasuko niadtong mga mapahitas-on nga gipasanginglan sa mga butang nga sa tinuoray ilang gibuhat”. Fezteleern!
Naghatag og risgo
Gipahimangnoan ni Mayor Michael Rama kadtong mga buot mokandidato sa umaabot Barangay ug Sangguniang Kabataan elections (BSKE) nga dili gamiton o ba kaha ilambigit ang city hall sa ilang kandidatura tungod kay ang iyang administrasyon nag-alagad man sa tanan. Buot sa mayor nga parehason pagtratar ang tanan’g kandidato. Sagad sa pulong lang mahitabo nga walay dapigan ang city hall. Dako’g tabang ang mga barangay o7cial panahon sa lokal nga eleksyon busa kinahanglan suportahan. Matud pa sa panultihon, “Ang pagpatoo nga walay tikas sa eleksyon, naghatag hinoon og dakong risgo sa integridad sa proseso sa piniliay”. Saoonz!