Unsaon sa pagsusi ang tinuod
Atubangan sa nagbaha nga mga bakak atol sa diktadura ni Ferdinand Marcos Sr., ang atong katiguwangan nakakita og paagi sa pagkahibawo unsa ang aktuwal nga mga panghitabo: Ang sukwahi sa mga gipanulti ni Marcos maoy tinuod.
Mao nga sa dihang nipasigarbo si Marcos nga nilampos siya sa pagbadlong sa pangurakot, nahibawo sila nga nisamot ang kinawatay sa iyang paboritong cronies. Dihang nipasalig si Marcos sa ubang kanasuran sa kamalambuon sa atong ekonomiya, nahibawo sila nga nabangkarota na ang nasudnong panudlanan.
* * *
Di pa ko andam nga mosagop sa kakuwang sa pagsalig sa nag-unang henerasyon. Pero may pasiuna nang mga timaan nga ang anak sa diktador, nga mao na karon ang nagtungkawo sa Malakanyang, way kalainan sa amahan.
Pananglitan, dihang nipasalig siya sa niaging tuig nga nakaplagan sa iyang makuti nga pagtuon nga abunda ang suplay sa asukar (pagmatuod nga naghimo sa iyang trabaho isip agriculture secretary, sukwahi sa mga pasangil nga mas ganahan siya sa paglaag sa ubang kanasuran ug pagtambong sa parties kay sa pagpakita sa Department of Agriculture), nagnihit ang suplay ug nisulbong pag-ayo ang presyo sa kamerkadohan.
* * *
Maong gikuyawan ko dihang nipasalig sa niaging semana nga, sukwahi sa mga pasidaan nga ang labing importante nga inadlaw nga pagkaon sa mga Pilipinhon ang sunod nga maigo sa krisis, dunay igong suplay sa bugas humay ang nasud.
Tuod man, usa ka adlaw human sa iyang pasalig nipahibawo ang National Food Authority (NFA) sa ilang plano sa pag-import og 330,000 metric tons sa bugas humay karong tuiga.
* * *
Bisan sa probisyon sa Rice Tarrification Law nga nagsugo sa NFA nga ang tipigan nga rice buffer stock nga igong ika-apud-apod sa mga biktima sa katalagman kinahanglan nga kuhaon lang gikan sa lokal nga mga mag-uuma. Wa maghisgot ang balaod og importasyon. Kay ang gahom paghatag og lisensiya sa rice importation mao na man ang Bureau of Plant Industry (BPI).
Si Marcos mismo nisugo sa NFA sa pagpamalit sa lokal nga bugas. Pero pasayloa kon nasobrahan ra ang kamadudahon. Gikuyawan ko nga, bisan sa tanang ulug-ulog sa presidente ngadto sa mga mag-uuma ug mga negosyante sa bugas humay, ang palusot ra gihapon sa NFA ang mapatuman.
* * *
- Latest
