Dili kompetensiya

Binasi sa: Lk. 18;9-14

Ang pariseo ning maong ebanghelyo kun buog hunahunaon daghan man siya og nahimo ug gani exemplary.

Apan ang nahitabo lang kay iyang gihimo ang iyang kaugalingon ingon nga sukaranan sa maong nindot moalidad.

Ang kobrador sa buhis sa laing bahin ang gihimo man nuon nga makalolooy. Luoy tungod kay gihimong sukaranan kun unsay dagway sa usa ka makasasala.

Ang kobrador sa buhis sa iyang bahin ang dili gani halos moyahat sa langit ug nangayo og pasaylo alang sa iyang kamasalaypon.

Giklaro ni Jesus nga ang kobrador sa buhis ug dili ang pariseo mao ang gikahimut-an sa Dios.

Sa atong kinabuhi sa pagtuo, usahay gihimo nato ang atong kaluwasan ingon nga kompetensiya.

Ang pagpangangkon nga kita mas maayo pa kay sa uban, ingon man ang paghimo sa uban ingon nga makalolooy ug ubos diha sa atong panlantaw timailhan lamang nga dunay sakit ang atong katilingban.

Mas sayon ang paghukom kay sa pagsud-ong sa atong kaugalingong mga sala ug kakulangan. Gitataw nga dili malipay ang Ginoo niini. Busa angayan lamang nga kita mangangkon sa atong pagkamasalaypon.  Nagkinahanglan kita og Ginoo sa atong kinabuhi sa hataas nga panahon nga gipalihok nato ang atong hunahuna kaysa atong kasingkasing.

Hinumdomi nga ang mga anghel nahimong demonyo gumikan sa ilang garbo.