Isog na, tiktoker pa

Buot si Presidente Marcos, Jr. nga mahimong “well-trained” ang atong military aron andam kini nga mosagubang sa mga komplikado ug nagkalisod nga hulga sa tensyon tali sa Manila ug Beijing tungod sa nagkabangi nga pagpangangkon sa mga isla sa South China China. Tinuod nga layo ra ang kapabilidad sa armas sa atong kasundalohan kon itandi sa uban’g nasud. Apan dili sila mabiyaan kon kaisog ang hisgotan, lakip na ang pagsayaw og Tiktok. Nakadayeg pa gani si Gen. MacArthur sa kaisog sa sundalong Pinoy busa nakaingon siya, “Hatagi ako ug napulo ka libo ka sundalo’ng Pilipino, ug buntogon ko ang tibuok kalibotan.” Paksit!

Palingog-lingogan lang

Giawhag sa Infrastructruce Development Committee (IDC) sa RDC-Central Visayas kadtong mga nalambigit sa nagpadayon nga proyekto’ng dalan diha sa UN Avenue eskina Plaridel Street sa Mandaue nga hisgutan ang hangyo sa Provincial Board nga undangon ug biyaan na ang maong proyekto ug nga hulipan na lang kini og rotunda. Dayag kaayo ang kakulang sa hustong pagplano sa maong proyekto.  Husto tingale ang awhag apan tungod kay awhag ra man mahimong palingog-lingogan lang.  Sayon ang pag-awhag nga hunongon apan lisod ang pagpatuman tungod kay matud pa, “Walay imposible alang sa tawo nga dili maoy mobuhat sa sugyot.”  Muleeng!

Tulobagon sa administrador

Sumala pa kang Public Attorney’s Office (PAO) Chief Persida Rueda-Acosta, mahimong manubag usab ang mga administrador sa mga eskwelahan kon ang ilang mga magtutudlo ug estudyante malambigit sa mga hazing rites.  Pinasikad ang maong pamahayag sa R.A. 11503, ang “Anti-Hazing Act of 2018.”  Bisan sa pagdumala sa atong tagsa-tagsa ka panimalay, tulobagon sa haligi sa panimalay ang mga panghitabo sulod niini. Busa, dili mahimong manghunaw ang administrador.  Kay ginaingon man nga, “Ang una’ng lagda sa pagka-administrador mao nga ang tanang sayop nga panghitabo sa eskwelahan, siya ang tagsala.”  Madahaan!

Gipadagan sa mga unano

Nag-viral sa social media ang nahitabo sa usa ka biyahedor nga si Cham Tranteras human siya moagi og makuti ug hataas nga interview sa kawani sa Bureau of Immigration hinungdan nga napakyas siya pagsakay sa iayang flight padulong sa Israel.  Gipangayoan pa gani siya sa iyang yearbook.  Bisan adunay balido’ng katuyoan ang BI, ang pamaagi sa pagtuki, nga miresulta sa kalangan ug kahasol, angayan nga susishon.  Haum ni’ng kahimtanga ang panultihon nga, “Ang burukrasya usa ka higante’ng mekanismo apan gipadagan sa mga unano.”  Pagkatoytoy!

Peke nga kauban

Gidakop ang usa ka policewoman nga giingon nga nangilad sa kauban niya nga mga police officers sa giingon’g modus nga “reassignment for sale” scheme didto sa Makati City.  Wala na ba gyud diay pili ang kapolisan nga bisan kauban sa buhat ila man biktimahon.  Mailad usab ang tawo tungod sa kinaiya nga magdali sa kabulahanan inay mosubay sa hustong proseso.  Mao nga milipang usab ang daghan mga peke nga tawo bisan kauban. Makapahinumdum sa reklamo sa usa ka hadinero nga nag-ingon nga, “Nangamatay ang akong mga fake nga tanom tungod kay nalimot ko pagpaka-aron ingnon pagmamisbis niini.” Fezteleern!