Makatabang kining pagpatuman og suspension sa permit to carry firearms outside of residence (PTCFOR) sa kapolisan didto sa Negros Oriental aron sa pagpatunhay sa kahapsay ug kalinaw sa maong probinsya.
Gikinahanglan kini nunot sa nahitabong masaker didto sa Pamplona nga gikamatay sa ilang gobernador nga si Roel Degamo ug laing walo ka tawo.
Ang PTCFOR mao ang pagtugot sa gobiyerno ngadto sa mga tawong nanagiya og mga armas nga makadala-dala niini sa gawas sa ilang panimalay alang sa ilang personal nga proteksyon ug sa ilang pamilya.
Sagad sa pagsuspenso aning PTCFOR buhaton panahon ra sa eleksyon aron kapugngan ang mga bayolenteng panagsangka sa nagkadaiyang supporters sa mga higpit nga magkaribal nga politiko o ba kaha kun dunay emerhensiya nga may kalambigitan sa armadong kagubot.
Kaning nahitabo sa Negros Oriental diin napatay ang ilang gobernador sa mga armadong mga tawo makapabalaka sa mga yanong molupyo. Sa tan-aw sa PNP, makatabang sa pagpahapsay sa probinsya kining maong lakang.
Apan maayo lang unta sab kun pinaagi niining suspensiyon sa PTCFOR mosanong sab ang mga kriminal, nga dili na magdala-dala og armas.
Kay kini ra bang magtak-in tak-in og ilegal nga armas dili ra ba motahod anang suspension sa PTCFOR o bisan unsa pa nang balaora, kay wala man sab silay papeles niini nga suspensuhon.
Sa laktod pagkaestorya, ang alkanse niini ang mga tawong legal nga nanagiya og mga armas. Mga tawong nagkinahanglan niini pang proteksyon sa ilang kaugalingon ug interes ilabi na kun duna silay mga hulga sa kinabuhi.