DA konsabo sa cartel?

Nabisto atol sa nagpadayong imbistigasyon sa House committee on agriculture ang panagkonsabo sa mga kurakot nga opisyal sa Department of Agriculture ug sa cartel sa sibuyas aron manipulahon ang presyo niini diha sa kamerkadohan hinungdan nga dihay higayon nga miabot og P800 ang presyo matagkilo.

Atol sa pagpadayon sa hearing niadtong Martes, Pebrero 14, usa sa mga opisyal sa kooperatiba sa mga mag-uuma og sibuyas didto sw Luzon mitug-an nga usa ka cartel ang nagpaluyo sa pagsulbong sa presyo.

Si Israel Reguyal, chairman sa Bonena Multipurpose Cooperative, mitumbok sa usa ka Lilia Cruz alyas Leah nga maoy utok sa cartel sa sibuyas nga nagkontrolar sa presyo niini.

Matud ni Reguyal nga dunay kakonsabo si Cruz nga mga tag-as nga opisyal sa DA. Ilang modus mao nga hutdon og kompra ni Cruz ang sibuyas gikan sa mga mag-uuma sa barato nga presyo og ilang tagoan aron pagmugna og artificial nga kakuwangan.

Sa higayon nga magnihit ang supply diha sa kamerkadohan hinay-hinay nilang buhian ang supply sa mahal nga presyo.

Pinaagi sa giingong konsabo niini diha sa DA ilang patuohon ang publiko nga dili igo ang abot sa mga mag-uuma busa kinahanglang mag-import ang nasud og dugang supply gikan sa gawas sa nasud.

Nihit hinuon ang mga impormasyon kinsay mga konsabo ni Cruz diha sa DA sanglit wala itugot nga ibulgar atol sa hearing ang ilang mga pangan. Gihimo ni pinaagi sa usa ka executive session busa ang mga membro ra sa komitiba maoy nasayod.

Dili ni unang higayon nga mitumaw ang pangan ni Cruz. Unang milutaw ang iyang pangan nga nalambigit sa cartel sa.mga produktong  agrikultura niadtong 2013 panahon pa sa administrasyon ni kanhi Presidente Noynoy Aquino.

Gipasanginlan sad siya kaniadto nga maoy nagmanipula sa pagsulbong sa presyo ss ahos kaniadto.

Gani niatubang na sab siya sa imbistigasyon sa kongreso atol sa maong higayon.

Ang Kongreso mirekumendar niadto nga pasakaan sila og kaso uban sa iyang mga kakunsabo sa mga ahensiya sa gobyerno.

Apan daw sa inutil ang kagamhanan pagbadlong niya. Luyo sa mga pasangil batok ni Cruz kaniadto pa tataw nga nagpadayon siya sa iyang kalihukan sumala sa mga kasayuran nga nitumaw sa nagpadayong imbistigasyon sa Kongreso pagsuta nganong labihan ka mahal sa presyo sa sibuyas.

Sayod ko nga si Cruz gigamit lang sad sa mga dagkong opisyal nga maoy nagsilbi niyang padrino aron magpadayon sa iyang kalihukan nga way bisan dyutay nga kahadlok.

Ug hangtud nga magpabilin sa pwesto ang iyang mga padrino magpadayon ang problema ug di gyud masulbad.

Isip maoy secretary sa agriculture, si Presidente Bongbong Marcos ray makabadlong nila. Kana kun wa makautang og kabubut-on ang presidente nila atol sa miaging eleksiyon.