Mga hudas nga anghel sa bilanggoan

Dili naman ni bag-o nga isyu sa mga jail facility sa nasud, gani dili naman balita kong adunay masakmit nga kontrabando sulod sa mga bilanggoan. Siguro mas balita pa kong mogawas nga hilabihan na gyud ka limpiyo ang prisohan gikan sa mga badlongon nga jail personnel nga mahaylo sa mga demonyo nang daan nga PDL.

Sagad mahitabo kini didto sa kaulohan apan karon nahimong sentro sa kontrobersya ang Cebu City Jail male dormitory human giyagyag sa kanhi binilanggo nila ang anomaliya nga iyang nasaksihan.

Nakalusot diay gihapon ang mga.gadgets ilabi na ang cellphone sulod sa prisohan bugti sa 50 mil ngadto sa 60 mil pesos nga suhol ngadto sa mga hiwi nga jail personnel.

Gawas niini, ang mga jail personnel usab ang tig timbre sa mga PDL sa higayon nga dunay ipahigayon nga greyhound operation ang PDEA ug PNP kauban ang BJMP ug sila usab ang mangunay sa pagtago sa mga cellphone, syempre bugti usab sa kwarta. Moingon matud pa ang mga adunahang PDL nga "sir kamo lang sa tago aning among cellphone kami nay bahala inig human." Bantug ra nga gamay ra nga kontrabando o usahay zero gyud ang resulta sa greyhound operation kay napangandaman namam sa mga PDL uban sa ilang mga protektor nga jail personnel.

Gausik usik lang sa panahon ug kahago ang nagpahigayon og greyhound operation nga itunong pa gyud og kaadlawon, sila lang ang giuntoy sa mga PDL ug sa ilang mga guardian.

Puwerte ra ba ka estrikto nga dili gani pasaksihan sa media ang operasyon kay lagi sensitive ang issue, maayo naman lang unta masayran direkta ang resulta sa greyhound.

Kini pasangil pa lang ug wala usab nganli kon si kinsa ang mga jail personnel ang nalambigit busa gikinahanglan nga tinud-on ang pag-imbistigar niini aron mogawas ang kamatuoran.

In fairness dili tanan nga jail personnel ang ingon niini kay mas daghan pa ang nagtinarong apan maduhig man gud ang tibuok institusyon kong wala silay himoon.

Unta dili lang kutob sa pulong imbestigasyon ang mahitabo kon dili aduna gyuy resulta ug masilotan ang mga naghimo sa ingon, ambot lang kong mahitabo ni.

Kong nakalusot ang cellphone, unsa na kaha ang ubang kontrabando sama sa shabu nga mas dagko pa siguro og offer nga salapi, dili malikayan ang ingon niini nga pagduda sa katawhan. Ang cellphone gud dako kaayong gamit sa mga PDL nga nalambigit sa illegal drugs sa pagpadayon sa ilang negosyo kay padayon man sila sa ilang mga transaksyon pinaagi sa komunikasyon. Matud ra ba sa PNP kasagaran sa ilang nadakpan nga mga durogista adunay kontak sulod sa jail facility, so makonektar nato kini sa panghitabo nga gibutyag sa whistleblower.

Samtang naningkamot ang mga otoridad pagsumpo sa illegal nga binuhatan, mahimong wala kiniy kaposlanan kong dili masumpo ang mga miyembro nila nga maoy nag proteher sa mga PDL bugti ang salapi, sila ang mga hudas nga anghel sa bilanggoan.