Mora’g giyugyog sa tumang kahalang akong kasingkasing pagkabasa sa balita nga ’Contigents sa Cebu City moapil sa Sinulog sa Carmen.’
Tiaw bay, luyo sa nasamad nga relasyon sa duroha ka lig-ong lider: Cebu City Mayor Michael ‘Mike’ Rama ug Cebu Governor Gwendolyn ‘Gwen’ Garcia, human kusokusoa-buwaga sa walay hunong nga ulan ang iya-iyang desisyon asa angay ipasundayag ang Sinulog 2023 grand parade, street dance and on stage competition, ang tanang konstituwente ubos sa ilang pagpangamahan ug pagpanginahan, nagpabiling nagkahiusa, nagsinabtanay ug nagkahinigugmaay?
Tungod sa padayong pag-ulan, nagmalapukon ang venue sa Sinulog 2023. Busa misugyot-hangyo si Gob. Gwen ni Mayor Mike nga sa kanhi naandang rota na lang ipahigayon ang Sinulog 2023 ug dili na lang sa South Road Properties (SRP).
Apan wala mosugot si Mayor Mike. Committed na siya sa tanang stakeholders nga iyang gikakontrata. Wala nay panahon sa pagsibog. Hinunoa, dako iyang pagsalig nga tabangan ra siya ni Senior Santo Niño.
Nakahukom si Gob. Gwen nga dili na lang moapil sa Sinulog 2023 sa Sugbo. Lakip uban sa mga partispanteng contingents sa kalungsoran, misimpatiya-suporta sa iyang desisyon. Ug nagkahiusa nga sa Sinulog sa Carmen na lang sila mopasundayag.
Ubay-ubay’ng Sugboanon ang nahingawa. Basig mao na kini sinugdanan nga ang one Cebu Island mabuak. Kaanugon sa mga katuigan sa ilang pagtinabangay kon tungod lang sa SRP Sinulog 2023 isyu, kini maguba. Daghang debotos ni Senior Santo Niño ang nangilaba: “Intawon, Ginoo, ayaw itugot nga kini mahitabo.”
Ug Iyang gitubag ang maong pangilaba. Wala bawia ni Gob. Gwen ang P20 million Sinulog 2023 financial assistance nga iyang gihatag sa Cebu City. Giaprobahan gilayon ni Mayor Mike ang request sa gobernadora nga 150 portable baths para sa Carmen Sinulog. Ug gipa-join pa niya ang atong Cebu City 2023 Sinulog contigents sa engrandeng Sinulog sa Carmen.
Kadalayegon sa gipakitang kinaiya nila ni Gob. Gwen ug Mayor Mike. Nagkasumpaki man tuod ang ilang hunahuna tungod sa managlahing prinsipyo, apan tungod sa ilang tumang pagmahal-pagdeboto kang Senior Santo Niño, pabiling nagkaihiusa ilang gugma sa pagpangalagad ngadto Kaniya, sa katawhan ug sa One Cebu Island nga hagbay rang gibantayan ni Gob. Gwen nga dili gayod ma-Sugbuak.
Keep it up, Gob!