EDITORYAL - Bagyo o LPA, angay magmatmangon

Dul-an 300 ka pamilya ug napulo na ka tawo ang nakalas niining padayong nasinating dautang panahon dinhi sa nasud nga milanat na og kapin usa ka semana.

Dili pa gani kini bagyo, low pressure area lang kini nga sagunson nga nisulod sa nasud gikan sa habagatang kasadpan sa Pasipiko agi sa Mindanao nga nakaapektar sa kabisay-an ug habagatang bahin sa Luzon.

Hangtud karon duna pa gihapoy mga tawong mabiktima og mga ingon niini nga dautang panahon dili tungod sa kakulang nila sa kaalam kun unsaon paglikay kondili sa kinaiyang kuwang sa pagpakabana.

Ang PAGASA walay hunong sa paghatag og mga kalamboan sa dagan sa panahon matag adlaw, wala sab sila magkulang sa pagpagawas og abiso o advisories sa tanan lakip sa mga local government units bahin sa dautang panahon.

Samtang daghan sa LGUs sab ang aktibo na sa disaster management apan kuwang sila sa mga gamit, pundo og mga eksperto aron mabuhat og tarong ilang trabaho.

Walay gustong dunay makalas matag dunay kakulian sa panahon, apan mahimo kining malikayan kun maminaw ang tawo ug andam makat-on.

Makadaghan na gikusokuso og bagyo sa Pilipinas, matag tuig dili momenus 20 ka mga bagyo ang mosulod nga lain-lain og gikusgon, dugangan pa sa mga tingulan ug kining LPA ug uban pang mga Sistema sa panahon.

Pun-an pa gyud aning epekto sa climate change nga ang nabag-ohan ang tanan tungod dili na na parehas sa kaniadto ang panahon karon.

Kani palang daan, nakat-on na gyud unta ang tanan sa pag-amping matag dunay kakulian ang panahon, bagyo man o bisan LPA.

Anugon kaayo ang paninguha sa gobiyerno nga mamenus-menusan ang kadaut dala sa paglain sa panahon, apan kun ang mga tawo dili moseryuso aning mga pasidaan ug pahimangno, wala nay mahimo ang gobiyerno kondili ang pagluwas nalang kanila.