Tuig 1995 pang adunay Cebu City Ordinace 1631: Pagdili sa mohatag og limos ngadto sa magpakilimos sa kadalanan, pangpublikong lugar, building o opisina ug mga establisamentong komersiyal.
Silotan ang masakpan: ang milimos ug nagpakilimos. Pabayrog tag P1,000 ang kada usa. Ug ang walay ikabayad paserbisyohon og 4 ka oras sa mga balwarte nga iyaha sa gobiyerno.
Matud pa sa Cebu City Anti-Mendicancy Board (CCAMB), sugdan ang istriktong pag-implementar niining balaora sugod Disyembre 22, 2022. Pastilan, nagpasabot ba kini nga sukad pa niadtong 1995 wala gyod diay hugti sa atong kadagkoan ang pagpasunod sa C.O. 1631?
Aw, mao diay, nga ang mga busy nga kadalanan sa siyudad pirmeng gihimo sa mga Badjao nga kawsanan sa ilang kapanginabuhian, bahala nag ilang giatubang ang dakong risgo sa ilang kinabuhi.
Ug kinsa bay matumbok nga sad-an? Ang naggunit sa hait nga sanggot mao ang atong gobiyerno. Samtang ang mga putlonong balili sa kadalanan nagpaabot ra gayod kanus-a putla sa naggunit sa sanggot. Gibuhat ba?
Tinuoray, may mga otoridad nga mi-rescue sa nagpakilimos sa karsada.
Pero mamalik gihapon. Timaan, nga atong mananakop, walay ngipon. Kon aduna man, tingale postiso. Dili makadulot.
Hinuon, masabtan. Kinaiya natong Sugboanaon ang kadali ra gyong maluoy ug ang pagkamanggihatagon kon may moduol-nagpakilimos. Ilabi nag mosenyas kini nga gigutom na ug wala pay kaon ang gikugos niining anak.
Diin gumikan sa kaluoy, maoy mopasulabi ang paghatag bisag nasayod nga kini nahisupak sa atong balaod. Niini, kita nakasala na.
Wala nato tabangi ang gobiyerno nga madisiplina ang nagpakilimos ning dapit nga dili tukma-ilaha. Kon dili, ato pa silang gidasig-suportahan.
Ang kadalanan para sa mga nagdagang sakyanan. Dili luwas alang sa mga makililimos. Ang C.O. 1631 giumol para sa ilang seguridad.
Dapat, seryosong sundon! Hunahunaa lang. Kon tanang sakay sa bisan unsang matang sa behikulo walay usa nga mohatag og limos, duna pa kahay magpakilimos sa karsada?
Ang balaod usa ka pagdisiplina aron pagtul-id sa kinaiyang hiwi. Busa, ang pagdisiplina usa diay ka matang sa gugma, diin ang pagtener sa sayop nga kaluoy gipadaplin-sakripisyo aron lamang mapugngan ang mga nahisalaag sa gisubay nilang dalan padulong sa kaalaotan. Ug magiyahan sa hustong agianan paingon sa ilang kaluwasan.