Kalipay mihari sa Basilica

Manggiluy-on si Senior Santo Niño. Ang ulanong mga adlaw sa Bag-ong Tuig 2023 Iyahang gipahunong pag-abot sa Enero 5, Huwebes.

Diin sa alas 4:00 sa kaadlawon, mibaha ang bagang duot sa katawhan nga mikuyog sa gipahigayong Penitential Walk with Jesus gikan sa Fuente Osmeña paingon sa Basilica Minore del Santo Niño nga pinangulohan ni Father Nelson Zerda, , Rector ug sa mga kaubanang pari.

May hustong gilay-on ang distansiyang lakawon sa mga nanguban. May mga edaran ug masakiton na, ang miapil. Apan makahibulong.

Kay imbes pangkapoyon, mibati hinuog tumang kalagsik ug malipayong mipadayon pagtambong sa unang misa-nobena sa buntag.

Tungod sa kahugot sa ilang pagtuo, nga ang pag-uban sa prosesyon sa Penitential Walk with Jesus, makaalim sa ilang balatian, wala nila igsapayan ang gilay-on sa ilang gibaktas.

Kay alang kanila, dili lang sakit sa ilang lawas ang maalim. Kon dili, hasta masakiton nilang kalag.

Sa ika alas 10:00 sa buntag na ko nga misa-nobena nakasimba sa maong unang adlaw. Ang presider, si Rev. Father Darryl Gitgano, kinsa usa ka Catholic defender kang kansang videos sa debate batok sa nagkalainlaing tinuohan, gi-post sa You Tube.

Sa iyang homiliya, miingon siya: “Kon ang imong pagtuo init, mausab ang imong mentalidad ug reyalidad. Apan kon atong pagtuo bugnaw, dili gyod mausab ang atong personalidad nga very bad.”

Mga pulong nga nahitukma sa kahugot sa pagtuo sa mga edarang nanguyog sa Penitential Walk with Jesus nga nahisgotan ko na sa unahan.

Mahilig si Fr. Darryl molamas og pasiaw sa iyang wali. Wala lang mabusog sa mga pagtulon-an ang mga nanimba, nabuhong sab sa katawa. Labi na diha sa iyang pag-ingon: “Palihug manindog, apil na ang nangatulog!”

Pag-abot sa opertoriyo, giawit ang ‘Bato Balani sa Gugma’. Tanang kamot giisa, giwarawara inubanan sa kinasingkasing nga pagkanta.

Sa matag panagway mibathay ang dili matukib nga kamingaw sagol kalipay.

Kay human sa duha ka tuig nga pag-antos, diin wala na nato makita personal ang naghuot-punsisok manimbahay sa mga misa-nobena alang sa kapistahan sa Balaang Bata, karon ania, nahibalik na.

Ug madungog na usab ang kalanog-kamaya sa nagkahiusang siyagit: “Viva, Pit Senior! Viva, Senior Santo Niño! “

Pagkalalim paminawon! Sa dughan, makauyog.