Rizal’s Day

Ang mga sinulat ni Gat Jose Rizal nahimong usa sa mga hait hinigiban nganong wala mailog sa gamhnanang kamot sa mga Espanyol ang Pilipinas, diin ang iyang kamatayon pinaagi sa firing squad human dakpa ug siloti sa mga banyagang langyaw didto sa Bagumbayan, nakapaisog pagsamot sa nagkadaghan grupo sa mga Pinoy'ng bayani, kinsa maoy mipadayon sa iyang dalayegong kawsa aron lamang maangkon nato  ang kagawasan.

Ania ang usa sa mga popular niyang panahom-pahinumdom: “The youth is the hope of our fatherland.” 

Apan subo kaayong palandungon, nga ang gi-appoint ni Presidente Bongbong Marcos (PBBM) nga Department of Justice Secretary mao si Jesus Crispin ‘Boying’ Remulla, kinsa sa iyang paglingkod pa lang, mipakita nang walay pagmahal sa maong gibiling bahandi-tugon ni Rizal.

Imbes suporthan ni Boying ang War on Drugs ni kanhi Presidente Rodrigo Roa Duterte (PRRD) nga makapanalipod sa kaugmaon sa kabatan-onan ug misanong sa prinsipyo ni Rizal, gitumbok hinuon niya si suspendidong Bucor Director General Gerald Bantag (pinili ni PRRD) nga maoy giingong  mastermind sa pagpatay ni Percy Lapid ug gipapulihan ni Gregorio Catapang, kinsa mahilig mohimohimog istorya ug esena batok ni Gen. Bantag nga morag layo ra sa tinuod?

Unya ang mga inmate, kinsa pulos naghupot og dautang records, mao pay gihimong testigos ni Boying ug Catapang batok ni Gen. Bantag, kinsa tungod sa hugtanong pakigbungo sa illegal drugs syndicates gikahadlokan sa drug lords. Para asa ba diay ang kasingkasing ni Boying ug Catapang?     

Nagkahugaw na si Boying tungod sa iyang anak nga napriso human masakping naghupot og gidiling marijuana. Bisag moingon siya, nga ang buhat sa anak dili buhat sa amahan, dili na kini makapalimyo kaniya. Kay kon unsa ang ngalan sa bunga, mao sab ang punoan.

Hangtod magpabilin si Boying sa iyang puwesto, magpabilin pong hugaw-dili patas ang imahe sa DOJ. Ug ning iyang gipakitang taras nga mas nakig-alayon pa siya sa mga piniriso aron wala nay Gen.

Bantag nga kanunayng nakig-away sa illegal drugs, sama ra nga gigisigisi ni Boying ang mga bulawanong tugon sa atong bayaning Jose Rizal: “The youth is the hope of our fatherland.”

Kaanugon sa maong prinsipyo-pahinumdom. Nga ning adlaw sa atong paghandom kaniya, giisnab lamang ni Boying.