Ang sam-ang

Sa akong pagtagik niini, gikan pa gyud ko tawon nagmisa sa among sam-ang dinhi sa Madridejos, Alegria. Sulod sa Duha ka mga tuig ang mga katawhan wala na makabalik ning maong sam-ang.

Dili man tuod dugok ang mga tawo apan daghan gyud sila ug daw daghan na pud ang mosulod gawas dinhing dapita.

Salamat sa kapolisan nga nagbantay ug nagpaambit usab sa ilang kaugalingong panahon at least nahimong malinawon ang tanan.

Kini tungod kay nagmabinantayon man pud ang katawhan.

Sa laing bahin, ang maong talan-awon nagpahinumdom kanato sa atong padulngan isip tawo. ang sam-ang nagpahigmata kanato sa reyalidad sa kamatayon. tingali makapila ko naman kini hisgoti apan ang pagpamalandong sa atong kamatayon mao man kadtong higayon diin atong kunhoran ang atong pagkamapahitas-on.

Kini tungod kay ang maong kamapahitas-on usa man ka dakong sagpa sa atong kaugalingon. Mobalik ra gihapon kita sa abog diin kita gikan. Ug ang atong kaambong ug katahum (kun ugaling anaa kita) ang sa kaulahian mahanaw ra. Makalabera ra.

Sa kaulahian nagmapasalamaton ako sa mga kalag tungod sa maong kahigayonan nga ako kanila makaalagad. Nisantop na nuon sa akong hunahuna nga gawas sa pag-ampo sa Santos nga Rosaryo akong tudloan ang mga kabatan-onan sa parokya kun unsaon ang pagnobena ug pagpamisa kay basin moabot ang panahon nga ang mga kabataan karon ang mahikalimot na kanato puhon. Pamasin man tuod kini uban ang paglaum nga sa pagdebosyon sa mga kalag silang mga kabataan makakat-on. In Pace requiescat! Pahulay sa kalinaw higala!