GMRC

Gusto ni Gobernador Gwendolyn Garcia nga ibalik sa pagtudlo sa mga tunghaan ang Good Manners and Right Conduct (GMRC) ug ang paggamit sa pinulongang Ininglis sa pagtudlo sa mga tunghaan.

Gitahasan sa gobernadora ang Provincial School Board (PSB) sa pagtuon sa posibilidad sa pagmando sa mga pangpublikong tunghaan sa pagtudlo sa GMRC nga subject gikan sa kindergarten hangtod na sa Senior High School ug sa pag gamit sa pinulongang Ininglis sa pagtudlo.

Ang Provincial School Board mitudlo ni Bokal Raymund Calderon sa pagpanguna sa technical working group nga pagalangkoban sa mga opisyal sa Departamento sa Edukasyon, mga opisyal sa provincial ug city school divisions, sakop sa League of Municipalities of the Philippines-Cebu Chapter ug representante sa pribadong sektor.

Gipasabot sa gobernadora nga ang pag gamit sa pinulongang Ininglis makapataas sa kompetensiya sa tinunan sa mga pangpublikong tunghaan.

Ang gobernador miingon nga gieksperimentohan lang ang mga bata, matud pa sa taho nga gihatag kaniya sa Provincial Information Office.

Basi sa PIO, gikan sa Kindergarten hangtod sa Grade 3 ang gamiton mother tongue, gikan sa Grade 4 hangtod sa grade 6 Tagalog, Grade 7 hangtod sa Grade 12 anha pa ipagamit ang English. Naglibog nag maayo ang mga tinunan.

Angay ug matarong lamang gayod nga ibalik sa pagtudlo sa mga tinun-an ang Good Manners and Right Conduct tungod kay nagkaminos na ang gidaghanon sa mga bata nga adunay maayong pamatasan.

Ning bag-ong panahon gikinahanglan ang pagtudlo pagbalik sa GMRC ngadto sa mga tinunan aron maalkontrahan ang dili maayong nakita sa mga bata o mga tinunan diha sa social media nga dako na kaayo og inpluwensiya kanila.

Mas maayo pod nga ibalik sa mga tunghaan ang pag gamit sa pinulongang ininglis sa pagtudlo sa mga tinunan kay dako kaayo kini nila og bintaha sa ilang tagsa-tagsa ka kinabuhi ug sa pagpangita og panginabuhi.