Goodbye, Msgr. Adel

Niadtong panahon nga si anhing Mgsr. Jose ‘Jomon’ Montecillo pa ang kura paroko sa Archdiocesan Shrine of Our Lady of Guadalupe, Cebu City, kada Domingo sa alas 7:00 sa gabii nga misa, ikauban gyod nako si Msgr. Adelito ‘Adel’ A. Abella.

Siya ang mass presider ug akoy usa sa mga lector nga iyang makauban tiyempo sa Liturhiya. Gaan kaayo ang iyang buot ngari namong tanan. Hinungdan, nga nahimo siyang suod sa among dughan.

Dinhay higayon nga akoy mibatbat sa Unang Pagbasa, diin wala tuyoa nasipyat ko. Tungatunga na ra ba sa kinatibuk-an dihang ako nakamatngon.

Haskang laina sa akong gibati. Misamot kainit ang hangin sa electric fan nga misapigad sa akong kalawasan. Naglibog: mopadayon, o mohunong? Ug pinaling nakadesisyon: “Bahala na, tiwason ko na lang!”

Hangtod nahuman ang misa, nabalaka ko basig kasuk-an ni Msgr. Adel. Sa iya ra bang homiliya kaganina, morag iyang namatikdan ang sayop kong nahimo. Pero wala lang niya lugita pag-ayo aron dili maklaro.

Sa nagkaabot na mi sa sacristy, nangayo ko niyag pasaylo. Pero igo ra niyang gihikap akong abaga ug mipahiyom. Daw nakasabot sa akong gibati. Mao kini ang Msgr. Adel nga akong nailhan. Masinaboton ug sobra ka mapasayloon.

Dihang gipulihan na si Msgr. Jomon og mga bag-ong Team of Pastors, wala na namo makita si Msgr. Adel. Dugay na kaayo ming wala makakita niya. Ug ambot, unsang pagka unsaa, nga sa miaging ikatulong semana sa Septiyembre, naapil man iyang ngalan sa mga patay nga gipamisahan?

“Namatay na diay si Msgr. Adel?” Gipangutan ko si misis, kinsa wala sab masayod. Unya, misamot akong kahikurat dihang pagka Oktubre 26, 2022 nagbansiwag sa usa ka Facebook page, kinsa mi-post nga si Msgr. Adel, sa maong adlaw namatay sa edad nga 75.

Gumikan niini, nanumbalik sa akong panumdoman kadtong daghang Domingo nga among gikauban si Mgsr. Adel sa kada 7pm nga misa. Diin, may mga maanindot siyang gawi nga kapanaminan ug angay sundon sa mga mangangalagad sa Diyos ug katawhan nga wala pa niini.

Mgsr. Adel, natapos na ang misyon nga gisangon sa Ginoo kanimo. Mao nga Iya ka nang gipapuli. With tears, flowers and prayers, goodbye, Nyor!  Home sweet home!