Mga buwak sa bukid blockbuster na

Karon pa lang fully booked na ang mga tanaman og buwak sa kabukiran sa dakbayan sa Sugbo sanglit aduna nay mga negosyante nga nagbayad nang daan sa mga buwak nga ilang komprahon sa adlaw sa mga minatay.

Nasayran nako kini gikan mismo sa mga magbubuwak sa Barangay Babag 2 ug Barangay Sudlon uno sa Cebu City diin arong giadto kay naghimo lagi sad ko og feature story sa panginabuhi sa mga magbubuwak.

Matud sa mga magbubuwak nga lauman nang daan nga momahal gyud ang presyo sa buwak samtang nagkaduol ang mga adlaw nga gipangandaman ilabi na nga tugotan na ang tanang tawo walay limit makasulod na sa sementeryo aron mobisita sa ilang mga mahal sa kinabuhi.

Tulo ka mga plantation ang akong giadto ug pulos naa nay mga buyers ang ilang mga harvesonon nga buwak ang uban naghatag na og advance payment aron seguradong maila gyud ang buwak nga mao usab ang ilang ibaligya nga adunay nay patong alang sa ilang ganansya.

Hinuon aduna pay higayon ang uban nga makaambit sa mga buwak kay mohatag pa man ang ubang mga flower planters apan ayaw na huwata nga moabot sa petsa nga gikinahanglan kini kay wala na gyuy mahatag kaninyo.

Duha ka tuig nga nalutas ang magbubuwak sa kalag kalag kay limitado ra man kaniadto ang makasulod sa mga sam-ang. Gani sa pagsugod sa pandemic wala gyud pasudli ang mga sementeryo busa karon panahon na nga makabawi sila og gamay.

Sa obserbasyon nako mora'g dili ingon niana ka daghan ang supply sa buwak sa bukid kay ang ubang buwakan naulahi man sa pagtanom og dili usab makaapas ang pagbuwak niini sa adlaw sa mga minatay busa magnihit gyud ug mosangpot sa pagmahal sa presyo.

Pun-an pa nga hilabihan ka mahal sa presyo sa mga kemikals ug abuno nga ilang gipanggamit hinungdan nga mapugos gyud sila sa pagpatubo sa presyo, alangan man kon magpaalkansi sila, kuwang ra sa ilang kahago.

Kausa ra sa usa ka tuig ang gigahin nga panahon sa paghinumdum sa mga mahal sa kinabuhi nga mitaliwan na sa laing kalibutan, agwantahon nalang ang taas nga presyo sa mga buwak nga ihalad sa ibabaw sa lubnganan nila.

Kong walay igong budget nga ikapalit, mamahimo ra man usab nga mangutlo lang og mga buwak sa tugkaran aron dili madak-an og gasto, ang importante mao ang paghalad og pag ampo alang sa kapahulayang dayon sa minatay.

Sa mga negosyante unta dili ipatigbabaw ang kadalo sa ginansya, mamahimo man nga patas-an ang presyon apan kinahanglang rasonable lang, dili manigbas sa presyo nianang adlawa.