Hangtod ning pagsulat, ingon sa madungog ko gihapon ang kalanog sa pinalakpakay sa mga tarong tawo sa atong katilingban dihang pagdiskurso ni Cebu City Mayor Michael ‘Mike’ Rama atubangan sa mga senior citizen atol sa pagsaulog sa Senior Citizen Month, siya miingon:
“Mangunay ko ron og tan-aw kay ang inyong i-indorse, inyong ipa-renew, kawatan. Ako nang ibutang sa inyong mga nawong. Kamo, barogi na ninyo. Kay ang inyong kontra, ako na! Ngano manghatag man mog kawatan? Ang gipangita nato sa Singapore-like Cebu City, kugihan! Dili tapolan. Dili sigeg absent! Panso, human tua sa mall. Out pauli sa ilaha, walay gitrabaho!”
Busa, dili mabasol si Mayor Mike kon iyang ayagon pag-ayo ang pagpili kinsay angay dawaton sa mga ipangrekomendar sa iyang mga barangay kapitan nga job orders. Kay base sa performance record sa mga job orders nga gipatrabaho sa miaging namunoan, nasuta niya nga daghang tapolan ug pala-absent ang nakalusot. Dili lang kini sila susama sa mga sagbot nga makahugaw sa imahe sa City Hall. Makaangin pa sa mga kaubanang empleyado, kinsa nagbinuotan sa ilang trabaho kay dili gustong mausik ang kuwarta sa katawhan, kinsa maoy nagsuweldo kanila.
Usahay, sa sobrang pamolitika, pipila ka barangay kapitan ang mahadlok mobalibad sa ilang kaalyado oras nga mangayo kinig pabor human sa eleksiyon. Hinungdan, nga bisag wala na gi-renew ang job order kay nasakpang nagsuroysuroy lamang sa gawas panahon sa trabaho ug mobalik lang sa trabahoan inig ting-uliay, pugsanon gihapon kini nilang irekomendar.
Dili ba sakit kaayo kini paminawon sa habig sa mayor, kay inay motabang sila pagpanglimpyo agig suporta niini, ang makahugaw man hinuong mga linalang maoy ilang isuplay?
“Ako nang ibutang sa inyong nawong!” Emosyonal nga nabuhiang mga pulong ni Mayor Mike. Wala gyod siya mogamit og: “Itamparos ko kana sa inyong nawong!” Timaan, nga bisan siya gisakitan, nagpabilin ang iyang pagka-soft spoken, ang iyang pagkamahigalaon.
Tungod kay, bisag unsay bulok sa inyong partido, mga kapitan, gusto siyang magkahiusa ang tanan sa pagpakiggubat batok niining nagkadaiyang sagbot nga giatubang sa atong siyudad. Buwahan, mahatagag posibilidad, nga matuman ang Singapore-like Cebu City niyang ginadamgo.
Gani, nangunay na siyag pagpanglimpiyo. Mga kap, tanang kapitan, ato siyang tabangan, bi!