EDITORYAL - E-bikes ug E-trikes

Ang electric bikes ug electric tricycles nakatabang og dako para sa mga sumasakay ug sa mga nigamit niini tungod kay ekonomiya kaayo kay dili man kini kinahanglang palitan og gasoline o krudo.

Gawas pa nahimo na sab kining panginabuhian sa uban gamit isip pasaheroan o delivery sa mga produkto.

Apan nabantayan sab nga kining mga e-bikes o e-trikes nga gigamit pangpasahero mogawas naman sa mga dagkong karsada. Dili man ni sila makaapas sa dagan sa mga de makina nga sakyanan mao nga maapektahan ang dagan sa trapiko.

Gawas pa niini, peligro kaayo kini para sa mga sakay ug sa mismong drayber sa mga e-bikes o e-trikes kay posible silang madasmagan.

Niadtong nakalabay nga buwan, duha ka mga tawo ang nakalas sa Barangay T. Padilla, ang drayber ug ang babayeng pasahero niini sa dihang nadasmagan sa usa ka service van.

Samtang tuod dili sila kinahanglang magbaton og lisensiya sa pagmaneho niini, dili sab unta sila moabusar pinaagi sa pagpamasahero pagawas sa mga dagkong karsada diin naa kanunay ang peligro.

Sa pagkakaron, ang Cebu City Traffic Office nangita og paagi aron dili mabutang sa peligro ang kinabuhi sa mga nigamit og e-bikes o e-trikes.

Kini mao ang pagdili kanila diha sa mga dagkong kadalanan tungod sa mga nahisgutang rason. Silang mga namasahero niini, sila palang maoy gitutokan karon sa CCTO tungod kay sila man sab maoy kinadaghanan itandi sa uban nga gigamit lang kini sa personal nga transportasyon.

Dili naman gyud unta kinahanglan pa nga ang lokal nga kagamhanan pa maoy mouna og himo og pamaagi aron maproteksyonan ang ilang panginabuhian ug ilang kaugalingon gikan sa mga disgrasya.

Mahimo ra man tingali silang mag self-regulate ug ibutang kanunay sa hunahuna ang ilang kaluwasan pinaagi sa dili pagagi sa mga dalan nga agianan sa mga dagkong mga sakyanan. Gamit kaayo ang e-bikes o e-trikes sa mga sudlonong dalan sa kabarangayan tungod kay daghan mang manakay niini.

Tungod sa problemang dala aning mga e-bikes ug e-trikes diha sa trapiko ug peligro kinahanglan gyud ang paghimo og mga regulasyon aron magsilbi sab nilang tamdanan alang sa legal nga paggamit niini sa transportasyon.