Usa ka siglong pag-alagad sa Sugbo
Kanindot sa pasidungog ni Fr. Roberto Archie Carampatan sa mga tagduma ug mga trabahante sa Cebu Maternity Hospital nga nagsaulog sa ilang ika-100 nga anibersaryo karong Septiyembre: Nga ikapasigarbo ang ilang pagpanalipod sa kahimsog ug pagluwas sa mga kinabuhi sa kabataan ug kababayen-an sa Sugbo sa niaging usa na ka siglo.
Atol sa Santos nga Misa gahapon sa buntag nga nisugod sa tibuok buwan nga kasaulogan, gitataw ni Padre Carampatan nga ang talagsaon nga lahutay sa institusyon mao ang ebidensiya sa kamapuslanon sa ilang serbisyo sa Sugbo ug mga Sugbuanon.
* * *
Ang mga nagpalihok karon sa ospital nga gipangulohan sa presidente nga si Dr. Ma. Christina Senerpida, dihang nakabati sa mensahe ni Padre Carampatan, morang nagdungan pagginhawa og lawom pasalamat nga ilang nalutsan ang labing seryusong mga hulga sa institusyon.
Inanay nga nakabangon ang ospital human sa kapin na sa duha ka tuig nga pandemya ug human napugos sa pagpanira tungod sa welga sa unyon pila ka tuig ang nilabay. Nasumpayan ang mabulukong kasaysayan sa pagbangon bisan sa diktadura ug sa pagkagusbat sa karaang istruktura sa ikaduhang gubat sa kalibotan.
* * *
Gidasig sila ni Padre Carampatan sa pagkat-on sa pagtulon-an sa sambingay ni Hesukristo sa bag-ong bino sa karaang sudlanan. Giawhag niya sila sa pagsunod sa kakugi ug determinasyon sa mga nag-una nila nga nagtukod ug nagpadagan sa ospital sa niaging gatos ka tuig.
Nanghinaot ang pari nga andam ang ospital sa paggakos sa bag-ong mga teknolohiya ug mga paagi sa pagtuman sa ilang misyon sa way paghikalimot ug pagtipas sa ilang kasaysayan.
* * *
Nikumpisal si Padre Carampatan nga nalipay siyang gikulbaan dihang naaprobahan ang iyang visa para sa iyang bag-ong destinasyon sa Australia. Daghan na siya og nahibaw-an ug nabasahan parte sa adunahang nasud pero way klaro nga ideya unsa ang nagpaabot sa bag-o niyang parokya.
Pero nalipay ang lumad nga Sugbuanon nga kamao siya nga mo-drive og sakyanan. Kay gipasidan-an nga lagyo ang mga lugar nga himoan sa iyang mga misa. Nalipay nga gitudloan sa iyang mga ginikanan sa gamay pang bata sa Dumanjug sa kasadpang Sugbo sa pagluto ug pagpanlimpiyo sa balay. Kay gipasidan-an nga siya rang usa ang magtikaw-tikaw sa kumbento.
* * *
- Latest
