Nahimong kabahin sa akong kinabuhi ang Carmelite Monastery dinhi sa Dakbayan sa Sugbo. Gani, niadtong nagtungha pa ko sa seminaryo magkanunayan kami dinhi labina sa buwan sa Hulyo. Human sa among pagpanganta mangaon kami kuyog ang ubang mga tawo. May giandam gyud ang mga madre alang kanamo. Ug sa akong nasayran ang si bisan kinsa nga mohangyo nga magpaampo magbilin man og itlog. Gani ang Seminario Mayor de San Carlos anhi man pud magpalitan og itlog. Usa ko sa mga nangumpra kaniadto. Dili pa lang dugay nahisakop ko sa Third Order of the Carmelite Discalced.
Bunga lang tingali sa duhiraw ni Daryl mao nga namugna ang scenario diin si Cory nagduwa og majong kuyog sa mga mongha sa Carmelo. Kun buot hunahunaon sa wala pa himoa ang maong film makatarunganon unta kun kining maong mga mongha gipangutana kun unsay nahitabo sulod mismo sa monasteryo niadtong panahona nga si Cory nisulod didto. Dili kini kalabot sa isyu nga si Cory gilabanan sa mga mongha kondili mahitungod kini sa isyu sa film nga gihimo. Mao gyud nga mahinungdanon ang pagduki duki sa dili ka pa modukdok. Kining matang sa obra nisalamin kun unsang matanga sa imahinasyon sa nagbuhat niini. Ang output maoy tubag sa daghang mga pangutana.
Dili dautan ang momadjong apan sa akong tan-aw dili ni applicable sa sitwasyon. Kining mga mongha o monghe dunay mga prayer periods nga lahi sa naandan. Halos kada oras dunay pag-ampo. Kun wa ko masayop naglambigit kini ning mosunod:
Matins- kasagaran 3;30 sa kaadlawon
Lauds kasagaran 5:30/6:00 sa buntag dayon Misa
Terce- alas 9:00 sa buntag
Sext- alas 12 sa udto. Gitawag usab kini og Midday Prayers
None- alas 3:00 sa hapon
Vespers- alas 6:00 sa gabii
Compline- alas 9:00/10:00 sa gabii.
Ayaw ko og ingna nga sa dihang niadto si Cory undangon lang ang ubang mga schedules nga naandan sa monastic life aron lamang paglingawlingaw og duwa sa majong? Hinuon, ang itlog nga way pughak, binugok. Dayon kamo sa Carmelo ug kining maong matang sa panabot atong iampo. Mahayagan unta ang ilang hunahuna ug pagbati.