Gustong gamiton ang balay nga gipatukod sa igsuon

Dear Atty. Divine,

Ang akong half-sister gihatagan og pagtugot ni mama nga makatukod og balay sa ilang yuta. Nilabay ang pila ka tuig nagkalalis sila si manang ug si mama hangtod nga nidesisyon si manang nga i-abandon ang balay kay dili na siya ganahan nga mopuyo niini. Ang akong igsuon nga lalaki interesado nga mao nalay mogamit niini. Apan miingon si mama nga mamahimo niyang gamiton apan kinahanglan nga bayran niya ang balay. Apan dili sila magkasinabot sa presyo. Unsa man ang angay nga buhaton sa side ni manang og ni mama. Daghang salamat. — Elmer

* * *

Dear Elmer,

Kun ang naggasto sa pagpatukod sa balay mao ang imong manang then ang angayan nga sabuton sa imong igsuon nga gustong mogamit niini kun pila ang presyo sa balay mao ang imong manang kay ang gipanag-iya sa imong mama mao ra man ang yuta. Mas maayo nga estoryahon gyud niya daan ang imong half-sister labot sa iyang paggamit sa balay kay mao man kini naggasto sa pagpatukod niini. At least, dili na siya maglisud og pagsabot sa imong mama kun iya nang maestorya ang inyong manang. Kanang away sa imong mama ug manang pwede ra sad na ninyo husayon og kamong mga igsuon mamahimong maoy mo initiate niini aron magkauli sila sa maayong kabubut-on. Thank you and God bless. — Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.