Ako ug ang prayerbook

Si Mam Vilma nisugyot kanako nga mohimo og compilation sa mga pag-ampo nga Sinugbuanon nga sarang magamit sa mga panimalay nga sakop sa parokya. Nakahatag kini kanako og kasibot mao nga sa walay langan gisugdan ko kini dayon.

Gawas nga kalipay ko kining maong proyekto, dako pud kini og kahimoan labina kun mobisita ako sa akong mga parokyano aron mag-ampo kuyog nila panahon sa kagabhion diin himoon ko usab ang pagbendisyon sa banay ug pagsab-ong kanila sa mga eskapularyo sa Mahal nga Birhen sa Carmen ug pagdasig kanila diha sa pagsimba sa mga adlaw nga Dominggo.

Ang prayerbook alang kanako dili lang usa ka libro diin napatik ang mga pag-ampo nga kinahanglanon sa matag banay, hinunoa ang prayerbook ingon nga proyekto usa man ka kahimanan sa pakigkukabildo sa Dios ug sa tawo.

Hagip-ot kaayo ang matag panahon sa pag-ampo labina gyud ning mga panahona. Kini tungod kay daghan kaayo ang buot mosakmit niini. Ang dili hamtong nga paggamit sa mga cell phones ug uban pa, timailhan man nga mas palabihon sa kadaghanan ang masabang paglingaw sa kaugalingon.

Usahay nahimong mas palabihon pa nato ang online game, chika ug misinformation kaysa kahilom ug ug maampoong pagpatidlum.

Gipakli ko og usab ang akong mga libro kalabot sa ag-ampo ug akong nakita ang commonality kalabot niini. Silang nagtug-an nga mamahimong usa ka walay hinungdan ang kinabuhi labina kun halayo kita sa Ginoo nga maoy tuburan sa atong kusog ug kalig-on, kalinaw, ug kalipay. Dios Solo Basta. Ang  Dios Paigo Na!