Ang tawo nga puno sa Espiritu Santo mosulti sa nagkalainlaing pinulongan. Kining maong nagkalainlaing pinulongan mao man kadtong pamaagi ang tawo nisaksi ni Cristo. Naglangkob kini ning mosunod: Pagpaubos, Kakabos, pagppailob ug pagkamasinugtanon.
Makasaksi kita kun kining mga butanga atong gipakita ingon nga birtud ngadto sa ubang mga tawo. gamhanan ang buhat kaysa pulong lamang. Himoon natong pasultihon ug patudloon ang atong mga buhat.
Puno kita sa mga pulong apan haw-ang ug walay unod ang atong mga binuhatan. Tungod niini nahimo kitang tinunglo sa Dios. Ang sanglitanan niini makita man nato sa balaang kasulatan diin gitunglo sa atong Ginoo ang kahoy’ng igera labina nga kini wala gyud makahatag og bunga sa dihang siya nagkinahanglan unta.
Matud pang Gregorio: “kamandoan ug balaod alang sa Magwawali nga iyang puy-an ang iyang giwali.” Walay kapuslanan ang pagbaton og daghang kahibalo kun dili kini ipakita sa binuhatan. (cf. Liturgy of the Hours Vol. III, p. 1470).
Si San Antonio de Padua giisip man ni San Hannibal Maria di Francia ingon nga Celestial Benefactor sa kongregasyon sa mga Padres Rogasyonistas. Sa matag higayon nga dunay suliran si San Hannibal sa mga butang material si San Antonio de Padua ang sangpiton. Mao nga hangtud karon si San Antonio de Padua ilang kauban ug pagasangpiton hangtud karon.
San Antonio nga walay kaluoy? Mao kini ang nahimong panlantaw sa kadaghanan labina sila nga nawad-an og mga butang. Kay si San Antonio mosilot kuno sa mga tawong hilabtanon og kamot. Mao nga makadungog kita nga moingon sila og: “Ipa San Antonio tika Karon!” sa ato pa sangpiton ang maong Santos aron pagsilot sa maong tawo. Apan ang maong Santos nahimong Santos dili tungod kay siya bangis, nahimo siyang Balaanon ug sangpiton tungod kay siya maloloy-on.
San Antonio Ig-Ampo mo Kami!