Makatuman ba gyud kaha sa iyang saad si President-elect Ferdinand “Bongbong” Marcos nga himoon niyang tag P20 ang presyo sa matag kilo sa bugas nga humay?
Kon mahimo man gani kini ni Bongbong, unsa kaha sab nga klaseha sa bugas humay ang tag P20 ang kilo? Nakahukom
ko paghisgot niining maong isyu kay ang Secretary sa Department of Agrarian Reform (DAR) miingon man nga posible kuno.
Ambot og dili ba kaha sipsip ra ni Secretary Bernie Cruz ngadto ni Bongbong ang pag-ingon nga adunay pamaagi nga
sa unang bahin sa 2023, mahimong mobarato na ang bugas.
Wa man siya mohatag og detalye kon unsaon pagpaagi nga ang prisyo sa bugas mobarato ngadto sa P20 ang kilo. Ang
kooperatiba sa mga mag-uuma, miingon nga mosamot kaalkanse ang mga farmers kon imando nga ibarato ang prisyo sa
humay.
Mangutana mo og ngano? Kay karon gani nga ang kilo sa Tipasi, (kanang wa pa mapaniti nga mga lugas sa humay) tag
P19 na man ang palit, pero alkanse pa sa gasto.
Kon pila kuno ang presyo sa matag kilo sa Tipasi, doblehon na tungod sa gasto sa pagpagaling aron nga mahingpit
na nga bugas. Mao na nga sagad tag P40 kapin ang kilo sa humay.
Pananglit himoon na nga P20 ang kilo, sa ato pa ang presyo sa matag kilo sa Tipasi, tag P10 na lang? Uy,
kaalkanse sa mga mag-uuma no nga mahal kaayo ang abuno?
Ambot og unsaon kaha pagpatuman ni Bongbong ang iyang gisaad sa katawhan atol sa kampanya.
* * *
Duna kuno’y ngan sa tawo nga namatay na, nga naapil sa lista sa mga hataganan og hinabang kay nabiktima sa bagyo
nga Odette.
Matud sa nabasahan nako nga balita, didto kuno kini mahitabo sa Poblacion, Pardo. Angay kini nga imbestigahon ug
dili dayon kita moingon nga usa kini ka anomaliya.
Mahimo man nga paghimo sa lista, buhi pa ang maong tawo ug kay nadugay man ang pagpanghatag, basin og wa na
makahuwat ug namatay na lang.
Kon kini man gani ang nahitabo, way anomaliya. Apan kon gituyo lang gyud nga ang ngan sa patay giapil aron
makakwarta ang mapahimuslanon, ang naghimo sa lista angay’ng silotan.
Sayod ra ba gyud ko nga si Mayor Michael Rama dili gyud mopasaylo og mga kawani sa siyudad nga magbinuang. Kon
kawani man sa barangay ang naghimo, kon may binuang man, aw, angay’ng silotan kini sa mga kapitan sa barangay.
Kon sakop sa MILO, aw, unsa pa, taktakon sa katungdanan.