Primera communion

Niadtong normal pa ang dagan sa panahon, ang primera communion kun ang first communion mahitabo gyud sulod sa school year.

Apan lagi gumikan sa pandemic ang tanan nausab. Kuyog na niini ang primera communion nga kalihukan sa mga kabataan sa akong Parokya. Salamat sa mga katekista nga naghago gyud alang niini.

Bisan pa man kun hagip-ot ang panudlanan apan sa tinguha nga mamahimong makahuloganon ang kasinatian ning mga bata gipangitaan gyud og paagi sa parokya.

Kuyog niini ang paghatag ug pagsab-ong sa eskapularyo sa Carmen alang sa tanan nga nitambong.

Dunay pipila ka mga punto sa pamalandong. Ug kini nagdapit kanato sa:

1. Pagtudlo sa mga kabataan nga importante gyud ang ilang gidawat. Wala lang nila dawata ang pan ug bino hinunoa gidawat nato ang lawas ug dugo ni Kristo mismo atong Ginoo.

2. Ang Ginoo diha sa Eyukaristiya nahimong usa kanato ug kita nahimong kabahin niya.

Siya ang atong kahimsog sa lawas ug kalag. Siya ang atong pagkaon alang sa panaw.

3.Sa dihang nahimong kabahin ang Dios sa atong kinabuhi unta mamahimong susama ang atong diwa ug kasingkasing sa iyang diwa ug kasingkasing usab.

Akong mga pahalipay sa mga kabataan ug mga ginikanan nga nitambong sa maong kalihukan ug unta mahimong ma sustain ang maong kadasig sa pagdawat sa Ginoo hangtud sa illang paghamtong.