Bisan niadtong wala pa ang pagpinaylanay og Certificate of Candidacy, ang diehard Leni supporters, nagsige nag sabasaba sa kadalanan ug ubang dapit aron pugngan ang pagkandidato ni kanhi Senador Bongbong Marcos (BBM) sa pagka presidente sa Pilipinas.
Petisyon nga ipa-disqualify si BBM sa iyang gidaganang puwesto, gisang-at sa mga walhong grupo ngadto sa Comelec, kinsa mipasangil nga nahukman kuno kini sa kasong moral turpitude.
Diin, human sa paghimog lawom nga imbestigasiyon sa Comelec en banc, ilang nakita ang kanhi hukom sa Court of Appeals, nga wala diay moral turpitude nga nabuhat si BBM.
Matod pa ni Ka Eric Sales, kanhi NPA cadre ug karon ania na moalagad sa atong gobiyerno, nakaila kaayo siya sa mga miyembro sa Communist party of the Phillipines (CPP), New People’s Army (NPA) ug National Democratic Front (NDF) kay kaniadto mga kauban ra man niya sila ug dunay higayon nga makuyog-mahimamat sa dinagkong walhong kalihokan.
Si Ka Eric mipahibalo, nga ang nagpaluyo sa kandidatora sa Leni-Kiko tandem, mao ang grupo sa CPP-NPA-NDF. Sa ilang campaign rallies, daghang miyembro ang nakita niyang nangapil.
Bisan human sa piniliay, matod niya, dili mohunong pagsabasaba kining mga tawhan kon si Leni mapilde. Sanglit, gusto sila nga ang komunismo maoy mohari sa Pilipinas ug dili ang kahiusahan sa katawhang nagmahal sa kalinaw ug kauswagan.
Husto ang gisulti ni Ka Eric. Atubangan sa Comelec, padayon ang pagpangitag gubot sa mga militanteng Leni supporters. Padayon ang paglabay’g lapok ngadto ni presumptive President BBM, kinsa maoy lehitimong gipili sa 31 milyones kapin nga botante. Diktador-kawatan! Ug gitikas kuno ang iniphanay sa piniliay.
Pastilan, kon may tikas, dapat nahuptang ebedinsiya maoy iwarawara sa mga plakards nga giisa-isa sa mga walhong raliyesta. Nungkang, bisag unsa na lay ilang ihingalan-pangdaot ni BBM. Ikaduha, may tukmang lugar asa isang-at ilang rekalmo – didto sa korte.
Dili makaangkon og simpatiya sa midaog nga buotang 31 milyones kapin ang hugawng protesta gikan sa palaaway nga 14 milyones kapin nga pildero. Posible pang makuhaan ug makig-abin sa nakadaog. Sanglit, ang hugawng protesta makababag man sa kauswagang giandam gikan sa napiling nakadaog.
Ania na, ang pagsilang sa mga bulawanong bidlisiw sa bag-ong adlaw. Mga raliyesta, ato kining hangpon!