Angay susihon

Angay lamang gayud nga mohimo og seryosong imbestigasyon ang hingtungdang mga ahensiya sa kagamhanan sa kontrobersiya kalabot sa giingong paggamit sa pipila ka politiko sa TUPAD project.

Ang TUPAD project, diin daghan ang benepisaryo dinhi sa dakbayan sa Sugbo, gimugna isip tabang ngadto sa mga nabiktima sa coronavirus disease pandemic ug dili angay nga ipamulitika. Kini ang giklaro sa reyihonal nga buhatan sa Department of Labor ang Employment.

Apan unsa ka tinuod ang mikatap karon sa social media nga nag-alegar kang Kongresista Bebot Abellanosa nga gigamit kuno ang maong programa sa iyang tulonghaan sa pagpanghatag og hinabang sa mga konstituwente sa south district?

Hinuon, dili kita molukso dayon sa maong akusasyon batok ni Abellanosa ug sa iyang tulonghaan. Atong hatagan ang kongresista sa iyang katungod nga makapahayag sa iyang side sa maong isyu.

Apan bisan pa man niini, angay lamang nga susihon kini sa mga hingtungdang ahensiya sa gobiyerno. Kini aron matino kon unsa ka tinuod ang maong akusasyon.

Daan nang mi-warning si Labor Secretary Silvestre Bello III ngadto sa katawhan ug sa mga politiko, ilabina sa mga kandidato sa piniliay karong adlawa, kabahin sa posibilidad nga ipamolitika ang maong TUPAD project.

Karon mibutho na kining maong alegasyon. Kon tinuod man ugaling kini, aw kinahanglan nga adunay manubag niini. Angay lamang nga ipakita sa kagamhanan nga seryoso kini paggukod niadtong mga nalambigit sa kahiwian.

* * *

Niining pagpahigayon sa piniliay karong adlawa, atong mga panghinaut nga unta hapsay ug malinawon kini. Ug alang kanatong mga botante, hinaut usab nga lamdagan kita sa kaalam gikan sa kahitas-an sa atong pagpili sa insakto nga mga lider.