Atong respitohan

Giisip nako nga amigo si kanhi Tourism secretary Joseph Ace Durano nga midagan sa pagka gobernador sa Sugbo, pero tan-aw nako, mabentahaan siya sa iyang kaatbang niining iyang pagsuporta sa kandidatura ni Bongbong Marcos.

Miiknat ang akong kilay pagkasayod nga si Bongbong Marcos maoy gisuportahan ni Ace Durano pagka presidente, kay nagtoo ko nga si Vice President Leni Robredo maoy iyang paluyohan.

Unang rason ang iyang kandidato nga si Vice Gov. Hilario Davide Jr. kaalyado ni Robredo, ug ikaduha, si Gov. Gwen Garcia nga kaatbang ni Ace Durano dugay na nga mipahibawo nga kang Bongbong siya misuporta.

Unsa kaha ang mahimong resulta niini? Kon kang Leni pa si Ace misuporta, posible pa nga ang mga dumadapig ni Leni adto gyud mobotar niya, apan kay kang Bongbong man siya misuporta, basin og dili na sila ganahan.

Apan tingali, gitimbang-timbang sab gyud kini ni Ace sa wa pa siya mopakanaug sa iyang hukom. Mao tingali nga dugay kaayo siya nga wa mohukom dayon kon kinsa sa mga kandidato pagka presidente ang iyang suportahan.

Buyno, ato gihapong respitohan ang hukom ni Ace kay tingali gihatagan niya’g gibug-aton ang panagsuod sa banay’ng Durano kaniadto ug sa pamilya ni kanhi presidente Marcos.

* * *

Dunay mga politiko nga dili kaayo ganahan nga pirming magpa-interview sa media, apan sa hilom nagtrabaho sila para sa kaayohan sa ilang mga lomulopyo.

Sama nila ni Mandaue City Mayor Jonas Cortes ug ni Talisay City Mayor Samsam Gullas, dili kaayo sila hilig nga magpa-interview sa media, apan daghan sila’g mga maayong binuhatan.

Tingali, kon imong isuwat dinhi, mahurot na lang ang gitagana kanato nga luna ug dili pa mahuman ang pagsaysay nato sa ilang mga gihimo.

Mao kini ang gitubag nako dihang gipangutana ko sa akong amigo ngano kuno nga lisud pildehon sa eleksyon sila si Jonas ug si Samsam.

Lahi sila sa usa ka mayor nga kusog kaayo mag-inartista, moapil sa pagmasa og semento, mosayaw, ug uban pa nga iyang mga drama aron paglingaw sa mga botante.

Ang gidayeg nako si Kongresista Lolypop Ouano-Dizon kay bisan og wa siya’y kontra pagka kongresista, mitrabaho gihapon alang sa kaayohan sa katawhan.

Ingon niana ang tinuoray’ng pangalagad. Sama gud ni Senador Bong Go, nga bisan og midaog na, apan padayon nga mobisita kon dunay mga dinagkong sunog sa lainlaing dapit sa nasud.

Dili na kandidato si Bong Go karon, apan gihisgotan nako kay nindot siya nga mangalagad sa katawhan, ug ang akong maguwang nakapenepisyo sa iyang kaayo, bisan og wa gani siya makaila.

Unta, ang mga modaog nga kandidato ingon kaniya og batasan nga manerbisyo.