Leni-Kiko ug BBM-Sara rally

Tanang kandidato gustong maoy modaog. Hinungdan, nga iyahay’g palabwanay kinsay kinadaghanang gidumog sa caravans, rallies ug uban pang matang sa pagpangampaniya.

Gidili ang vote-buying. Pero kinahanglang naay minilyong pundo ang mokandidato ilabi na sa gipanag-ilogang kinatas-ang puwesto sa atong nasod aron may ikasarang paggasto sa bisan unsang paaging nahunahunaan, nga makahatag og dako niyang bentaha pag-angkon sa gitinguhang kadaogan.

Ang pagdawat og minilyon o binilyong kantidad nga suporta pinansiyal gikan sa mga higanteng magpapatigayon, usa ka buhat, diin magsugod ang gikahadlokang korapsiyon nga antuson sa katawhan sa umaabot nga mga adlaw. Kay kon ang esuylahan adunay ‘Study now, pay later!’, ang politika naa poy ‘Run now and pay when you win!’ Rason, nganong dili mahanaw ang korapsiyon!

Sa Pinklawans ug BBM-SARA Uniteam rallies, adunay dumadapig sa masig ka habig magyawyaw: ‘Nga puro hakot kuno ang nakapadaghan sa mitambong, pulos binayran, pirmeng nagdalag daghang artista!’ Dapat, hunongon na kini. Sanglit, ang maong magkaatbang, mibuhat niini.

Hinuon, mamatikdan ang kalainan sa mga gipanghimong rally niining duha ka tandem. Kon ang Leni-Kiko supporters magsiyagitsiyagit ibabaw sa entablado, nga si BBM kawatan, diktador, tikasan ug uban pang masakit nga pasangil, ang BBM-SARA Uniteam, pabiling kalma sa ilang pagpangampanya.

Lunlon plataporma para sa kabulahanan sa tanan maoy kanunay nilang hisgotan. Pahiyom ug luha sa kalipay ang pirmeng mahulma sa mga nawong ni BBM ug Inday Sara, ilabi na niadtong higayon nga gipaulanag mga pulang bulak ang ilang gibarogan gikan sa bagang duot sa nagpasingulan nga katawhang nagmahal kanila.

Mga gidibuhong hulagway ni Inday Sara ug BBM gikan sa mga dumadapig nga pintor, kinasingkasing gitunol-hatag samtang si Inday, o si BBM nagdiskurso. Samtang sa Leni-Kiko, wala!

Sa iniphanay sa nanambong sa rally, ang Leni-Kiko organizers mohatag og grabeng pinaburot nga numerong layo ra kaayo sa gideklarar sa kapolisan. Samtang ang sa BBM-SARA organizers, duolduol rang magkatugma sa ihap sa kapolisan.

Pipila lamang kini sa mga Leni-Kiko ug BBM-SARA rally, nga mopalutaw sa kalainan sa duha. Kinsa kanila ang palaaway, kusog mangyatak? Ug kinsa ang nagpayatak, nagpabiling mapaubsanon kay maoy tumong ang kahiusaan sa tanan? 

Haduol na ang adlaw sa piniliay. Kinsa kaha kanila ang modaog? Ikaw, botante, ang mohukom!