Kutob lang sa pulong ang tanan  

Kong kalapasan sa lagda sa eleksiyon  ang hisgotan halos tanan seguro nga mga kandidato ang mapasakaan og kaso, anaa naman gyuy balaod pero lisod kaayo ipasunod sa mga tawong gahig ulo.

Niadtong Martes nagpahigayon ang Comelec og Oplan Baklas sa mga campaign posters nga wala sa common poster areas ug daghan kaayo ang ilang nabaklas sa dakbayan ug sa lalawigan sa Sugbo.

Sa siyudad naay duha ka kandidato ang gitawag ang attention kay gipamutang ang ilang nawong sa mga poste nga dayag kaayong violation.

Nangabaklas man niadtong adlawa pero pagtalikod kuno sa taga Comelec ug sa kapolisan gipamutangan na usab og balik, pastilan gakapoy kapoy intawon ang mga hingtungdan ahensya nga nausik ang kahago.

Nahulog nga ceremonial baklas kutob lang sa camera ilabi na kong walay.masilotan nga mga.violators.

Samtang sa isyu sa mga rally, tataw kaayo nga gidili ang paghakot og mga tawo pero klaro usab kaayo ang paglapas niini sa mga ga organize sa kalihokan.

Dili naman gakahadlok ang mga naghimo niini kay nasayod sila nga makalusot ra man gihapon.

Ang ubang grupo nagpaklaro gani sa ilang kadismaya sa LTRB nga wala kuno hatagi og special pernit ang mga bus nga sakyanan sa mga supporters ngadto sa venue.

Wala nalang unta sila mobutyag niini nga gipaagi pa social media kay matod sa Comelec maisip gihapon kining  violation kay pagpanghakot man.

Wala may mapili kay ingon man usab ang nahitabo sa ubang mga dagkong rally kay ang katarongan igo ra sila nag provide og kasakyan sa mga tawong nanambong.

Mahimo kining ireklamo basta adunay suportang ebidensya isip maoy batakang proseso.

Bisan kapila pa ireklamo nakalusot ra gihapon busa dili na ikahibulong nga nagpadayon ang mga gahig ulo sa paglapas sa balaod sa eleksyon.

Bisan motambling ug mo-split pa ang Comelec sa pagbadlong apan kutob ra gyud sila sa estorya kay nabungol ang mga violators sa kagahi sa ilang ulo kay dili man gyud tinod-on sa.pagpasaka og kaso.

Limitado ang  manpower sa Comelec dili pud nato sila mabasol nga  kutob lang sila sa estosya, gadako lang ang huna huna apan daw dili makalihok.