Sa ibabaw ning paril

Mao kini ang akong column kaniadto niadtong nagtungha pa ako sa seminario sulod na sa daghang mga katuigan. Human sa akong graduation panagsa na lang ko makaadto ngadto kaha tungod sa ka busy sa daghang mga trabaho sa parokya. Apan dunay mga higayon nga tungod sa kamingaw buot kong motaak sa dapit diin nahimugso usab ang akong pagkatawo ingon nga pari.

Daghan na ang nausab ngadto. Wala na ang among tagsatagsa ka mga kwarto niadtong dyakono pa kami. Ang kanhi TV room diin manan-aw kami og Dragon Balls Ingon nga usa ka library. Ang St. Jerome nga kanhi namo library nahanaw na sa hingpit. Sa dihang gitukod ang IEC Building anha pa sila nakaalinggat nga gubaon ug dili na safe ang maong building. Sa among pagtungha kaniadto wala may naghisgot namo og guba.

Sadya kaniadto kay inigka second semester sa fourth year theology mga Biyernes pa lang daan adto ka na sa parokya nga imong adtoan aron ka didto mo serve isip diyakono. Apan lahi na karon kay gumikan sa covid sa kalit nahimong mingaw ang seminaryo ug limited na pud ang gidaghanon sa mga seminarista nga nagtungha sa gitawag nga Seedbed of Asia’s waiting land matud pa sa among San Carlos Hymn.

Apan daghan siyang gitudlo ngari kanako isip iyang produkto. Ug kini pinasikad sa SEE JUDGE ACT Pastoral Method nga hangtud karon padayon nakong nadala.

Seeing kun ang pagtan-aw sa mga hitabo ug kasinatian ug gani ang pagsinati usab niini.

JUDGING kun ang paglantaw ug paghukom ginamit ang pagtulon-an sa Simbahan.

ACTING kun human sa pamalandong ug proseso mahimong magambalay ang mga programa agig sanong sa suliran nga anaa.

Apan mao kini ang kuwang karong mga higayona. Daghang mga tawo ang dili na gani mogahin og panahon sa pagpamalandong. Mao nga hangtud karon bisan gani ang atong pagsabot sa atong ministerial activity usahay nahimong salingkapaw lamang….daw habo habo nga mahimong mag-aagad lamang sa hangin.