Ang ikaupat nga Dominggo sa Kwaresma gitawag man og Laetare Sunday kun Domingo sa Kalipay mao nga sul-obon sa pari mao man ang pink nga vestment. Ning panahon sa piniliay kinahanglang pink usab ang atong panghunahuna diin nagpasabot kini og:
Pag-ampo nga unta dihogan sa Dios ang angayan ug matarong nga kanato modumala.
Ituboy unta sa matag tanlag sila nga maantigong maminaw sa mga panginahanglan sa atong katawhan ug nasud nga Pilipinhon.
Ngitngit ang atong nasudnong panaw kun atong ituboy sila nga wala sa kamatuoran ug bugtong kaugalingon lamang ang gihunahuna inay ang kinabag-an.
Kahibalo ug Kaantigohan maoy gikinahanglan aron pandayon ang plataporma alang sa nasudnong kalambuan. Ug dili ang hanaw ug basiyo nga mga panaad.
Sayud kita nga daghan sa mga Pilipino ang dili kontento sa dagan sa kinabuhi.
Apan hinumdomi matag usa dunay sagradong kaakuhan sa pagbotar.
Mogawas kita aron mopili apan labaw sa tanan, mahinungdanon kuyog sa maong kadasig ang pamalandong, pag-ampo ug pagsakripisyo aron mamahimong gawasnon ug modelanto ang matag Pilipino.