Baligyaanan dili puy-anan

Ang Cebu City Market Authority mihangyo sa mga manindahay sa Freedom Park ug Warwick Barracks sa pagpahawa na sa ilang gitindahan aron makabalhin na sila didto sa interim building kutob na lamang niadtong Marso 15 ning tuiga. Ang notisya sa hangyo gipadala sa Market Operations Divisions niadtong Marso 8.

Ang Freedom Park ug Warwick Barracks mao ang dapit sa merkado sa Carbon diin pabarugon ang moderno nga merkado nga mao nay baligyaan sa tanan nga mamaligyaay sa Carbon.

Aron dali nga makita sa mamalitay ang mga baligya sa interim market building gikinahanglan nga limpyohan ug hawanan ang dalan Calderon nga kilid ra usab sa interim building. Ang dapit nga pagabalhinan sa mga manindahay andam na. Apan ang pipila ka mga manindahay nga nagmagahi sa modernisasyon sa Carbon nagdumili sa pagbalhin sa interim building tungod kay ang kasamtangan nilang nahimotangan diin sila namaligya gihimo usab nila kining poyanan.

Ang merkado baligyaanan dili poyanan. Ang Market Code sa siyudad nagdili nga himoong puy-anan ang baligyaanan sa merkado. Mayorya sa mga manindahay sa Freedom Park ug Warwick Barracks nangandam na sa ilang pagbalhin sa Interim Building gawas lang sa pipila ka book nga nagsaba-saba ug misupak.

Ang mga misupak miingon nga dili sila mobalhin sa interim building tungod kay dili makita ang ilang paninda apan kining maong rason lisod nga toohan kay ang tawo nga nanginahanglan sa ilang baligya mangita gyod sa ilang baligya. Pariha sa baligya nga shabu nga bisan asa magtago ang mga namaligya niini matoltolan gyud sa mga adik nga gustong mamalit.

Lain nilang rason sa pagsupak ug pagdumili sa pagbalhin sa interim building tungod kay nakapundo pa ang kaso sa hukmanan ug wala pa kini naresolbar. Haw-ang kini nga rason. Pero kadiyot lang. Mao gyod kaha kini ang tinuod nga rason? Wala kaha gamita ning maong grupo sa mga politiko nga kontra sa nagpasiugda sa modernisasyon sa Carbon?