Sa dihang gisud-ong mo ang uban

(Pinasikad sa: Lk. 6;36-38)

Anaa gyud ang bias mosugot ta ug sa dili. Ang uban atong gisud-ong sa atong pagsud-ong nila dunay mga butang nga motumaw diha sa atong panghunahuna ug mga pagbati nga mogitib diha sa atong kasingkasing. Nagpasabot lamang kini nga bisan unsaon duna gyud tay ikasulti sa uban ug ang uban dunay ikasulti ngari nato.

Ug kun sa unsang paagi nato gisud-ong ang uban, nan, ingon ini usab ang paagi nga atong gisud-ong ug giila ang atong kaugalingon. Kay unsa man gani ang atong taksanan nga gigamit sa uban, mao man usab ang taksanan nga gigamit nato sa atong kaugalingon.

Busa kinhanglang buhaton nato kining mosunod:

1.  Paghimo og maayo sa uban kay ang paghimo og maayo mosalamin usab sa atong personal nga kaayo.

2.  Likayi ang pagsulti og dautan kay ang paghimo sa ingon mopadayag kun unsa kahugaw ang atong hunahuna.

3. Paghilom sa kanunay kun kinahanglanon. Dunay mga tawo nga bugtong sayop lamang sa atong gipamulong ang ilang bantayan. Mahimong gamiton kini nila batok kanato.

4.  Bisan pa man diha sa kapungot, sa pagsulti og maayo sa gihapon ikaw paningkamot. Pinaagi lamang niini mamahimong daw makahuloganon ang imong kinabuhi ug pagbati.

Ang tanan nagasukad ra gyud sa perspektibo ug ang matag perspektibo dako man kaayo og kahimoan aron mausab ang dagan sa kalibutan.  Kun tudloan pa lang unta ang matag usa nga positibo ang panlantaw sa matag hitabo nan, mamahimong positibo usab ang tanan alang kanato.