Seguro nang mosaka ang presyo sa mga produkto sa lana sa ikasiyam nga sunudsunod nga semana karong semanaha. Gikabalak-an gani nga mas dako ang uminto kay sa nangaging mga semana. Ang pag-ulbo sa hingpit nga gubat sa Ukraine ug Russia gikahadlokan nga moresulta sa laing kalibotanong krisis sa lana.
Nihit nang daan ang suplay sa lana sa wa pa ang gubat. Human gilusad ni Russian President Vladimir Putin ang pag-atake sa nagkalainlaing bahin sa Ukraine sa yuta, dagat ug kahanginan, nisamot ang kalisang sa higanteng kaguliyang sa suplay sa lana.
* * *
Tungod sa gubat, nilapas nang presyo sa $100 kada baril sa labing unang higayon sukad sa 2014. Kon di mahusay dayon, padayong mosulbong ang presyo sa lana dinhi sa ato sa mosunod nga mga semana. Mosamot og kaapiki ang mga motorista. Nga wa pang katilaw og laslas sukad sa pagsugod sa 2022.
Mas mag-apura ang transport groups og uminto sa plitehan sa mga sakyanang pamasahero. Nga kon aprobahan sa gobyerno makadugang sa kalisod sa katawhan. Kansang kinitaan naibanan, kon wa man maputol, sa kapin sa duha ka tuig nang pandemya.
* * *
Gibalibaran nang daan sa Land Transportation Franchising and Regulatory Board (LTFRB) ang demanda sa PUJ drivers nga lugwayan ang fuel subsidy karong tuiga. Sa way pagsulti kon nahurot na ba og apud-apod ang P1 bilyon nga subsidy sa niaging tuig ngadto sa 136,000 ka PUJ drivers sa Sugbo ug ubang bahin sa Pilipinas.
Wa ra ba motagam ang LTFRB sa ilang mga bulilyaso sa unang duha ka hugna sa fuel subsidy. Nga wa madawat sa pipila ka drayber kay nasangit sa operators. Ang subsidy sa niaging tuig giagi gihapon sa operators.
* * *
Labaw’ng hanap ang gipangayo sa transport groups, nga gidasonan sa Department of Energy, pagsuspenso sa excise tax sa lana nga gipahamtang sa pamunoan ni Presidente Duterte. Kay nagbakasyon ang mga senador ug mga kongresista para sa politikanhong kampanya. Mobalik ang sesyon liwas pa sa piniliay.
Hangtod sa niaging semana, daghang salamat sa TRAIN Law ni Duterte, ang kinatibuk-ang uminto karong tuiga niabot na sa P10.85 kada litro sa krudo, P8.75 kada litro sa gasolina ug P9.55 kada litro sa kerosene.
* * *