Estriktohon gyud

Para kanako, angay’ng did-an gyud ang pagpataka’g butang og mga propaganda campaign materials sa mga kandidato nga nagtoong pwede ra bisan asa ibutang, basta anha kuno sa private property.

Apan nasayod ko nga lisud kaayo kini ipatuman, gawas tingali kon hugtan gyud ang pagpanakop unya ikiha ang masakpan nga naghimo niini kay mahadlok na man sila nga mohimo kay basin og madakpan ug mapasakaan og kaso.

Sukad ko nakamatngon og buot, naandan na gyud nga kada eleksiyon, magkatap ang mga campaign posters sa mga kandidato bisan asa nga dapit. Sayon ra man gud kaayo ang pagrason nga posibleng gihimo kini sa ilang kontra aron sila madaot.

Pero ang tinuod, ang nagbutang sa maong mga propaganda materials mao ang ilang mga sinugo, o mga sinuholan. Kon tugotan nga mahimo ra’ng mabutang ang mga campaign posters/billboards sa mga private places, kayamukat ra ang agi. Angay’ng mahibaw-an sa katawhan nga ang balaod sa eleksiyon duna lang tuo’y silot nga dili molabaw sa unom ka tuig, apan timan-i nga dili makapahimulos og Probation kadtong mga makonbikto og election offenses.

* * *

Nakabantay ko nga si Mayor Michael Rama gusto gyud nga mahatagan og financial assistance ang tanan, ilabi na kadtong nakaangkon og kadaot ang ilang kabalayan, atol sa bagyong Odette.

Apan ang nakadaot lang kay dunay iyang mga sinaligan, apil ang mga opisyal ug kawani sa kabarangayan, nga palpak sa ilang mga trabaho ug mao nga daghan ang gisakitan pag-ayo nga sila wa makadawat sa hinabang gikan sa siyudad.

Sayonan ka nga ang uban nga wa gani magub-i og panimalay nakadawat, samtang ang mga nagub-an gyud og balay wa maapil sa lista?

Unya, duna pa’y mga nagpuyo sa usa lang ka balay nga nakadawat bisan og ang gimando sa mayor nga kada balay, usa ra gyud ang ihatag.

Nganong naingon man kini niana? Tungod kay duna gyu’y mga pabor-pabor. Unta, kadtong angayan gyud nga tabangan, makadawat na sa laing pagpanghatag. Ang pangutana, kanus-a ang sunod nga pagpanghatag?

Nakasabot ko nga nauwaw kaayo si Mayor Rama sa gihimo sa iyang mga sakop, apil ang mga sakop sa MILO sa lainlaing mga barangay.

* * *

Ang Cebu City nagsaulog karong adlawa sa ika-85 ka tuig nga sumad sa pagkahimo niini nga siyudad kaniadtong 1937. Nindot kaayo handumon ang nangagi, apan sigurado ko nga ang mga opisyal dili na makahunahuna paghandom kon unsa ang Sugbo kaniadto nga usa pa kini ka lungsod.

Ang kanunay nila nga balik-balikon nga ang Cebu City nahimong siyudad tungod ni Don Vicente Rama nga senador niadtong higayona. Para nako, kuwang ang paghandom.